سوزسیزگه: بیر امریکا عسکریگه بیش طالب قوماندانینی آلمشتیریش جایزمیدی؟

Image copyright afp

اوتگن هفته امریکا جمهوررییسی نینگ بیر بیاناتی افغانستانده اکثریت نی حیرت لنتیردی. جمهوررییس باراک اوباما کوتیلمه گنده طالبان قولیده توتقینلیکده بولگن بیر امریکاعسکری عوضیگه گوانتاناموده سقلنگن بیش طالبان محبوسی نی قوییب یوباریلگنینی اعلان قیلدی. طالبان بیش قوماندانی عوضیگه قریب بیش ییل دوامیده توتقینلیکده اوشلب تورگن سرجنت بویی برگدال قوییب یوباریشگه راضی بولگن. امریکا و طالبان اره سیده کیلشوو قطر حکومتی واسطه چیلیگی ده عملگه آشگن. امریکا عسکری گوانتاناموده سقلنگن طالبان نینگ بیش ییتکچی قوماندانیگه المشتیریلگنی مناسبتی بیلن افغانستانلیک طالبان رهبری ملاعمر هم بیانات چیقرگن. میلادی 2001 ییلده افغانستان ده حاکمیت دن آغدریلگنیدن کیین ملا عمر کم دن کم بیاناتلر چیقه ره دی، بو بیاناتده امریکا حربی سینی طالبان رهبرلریگه المشتیریلگنینی " کتته غلبه " دیب ایتگن. " مین بوتون افغانستان مسلمان خلقی گه چون یوره گیمدن تبریک لیمن" دیگن طالبان رهبری اوز بیاناتیده. عینی پیتده امریکا رهبریتی برگدال نی آزاد قیلیش عملیاتی نیگه تیزلیک بیلن عملگه آشیریلگنینی حمایه قیلیب چیقیلیشی گه توغری کیلگن. اوشبو کیلشوو دن اگاه قیلینمه گن افغانستان حکومتی اسیرلر المشتیریلیشینی قاره لب چیققن. بو خلق ارا قانون چیلیکنی بوزیش دیب ایتگن. خوش سیز عسکر برگدال نینگ بیش طالب یوقاری مرتبه لی قوماندانیگه آلمه شووینی قندی بهالی سیز؟ طالبان قوماندانلری قوللریگه ینه قورال آلمسلیکلریگه کیم کفالت بیره دی؟ محبوسلر المشتیریلیشی افغانستانده تینچلیک جریانیگه یاردم بیره دیمی؟ پنجشنبه کونی جانلی روشده اوزه تیله دیگن سوزسیزگه برنامه میزده عینی شو سواللرگه جواب ایزلیمیز. برنامه میزده اشتراک ایتماقچی بولگن تینگلاوچی و اوقووچیلریمیزدن صحیفه میزگه اوز مبایل نمبرلرینی قالدیریشینی سوری میز. بی بی سی اوزبیک خذمتی