عبدالله سیلاو جملاغی تقلب حاللریگه عاید ینگی حجتلرنی آشکار قیلدی

اصلاحات و همگرایی سیلاو گروهی جمهور رئیس لیک سیلاو لریده تقلب حاللرنینگ یوز بیرگنیگه دلالت قیلیشی ایشانیله یاتگن ینگی حجت لرنی آشکار قیلگن. عبدالله عبدالله طرفدار لری تمانیدن آشکار ایتلگن ینگی حجت لر بیر ویدیو و بیر سیس تسمه دن عبارت بولگن .

کابل ده بولیب اوتگن مطبوعات یغینی ده عبدالله عبدالله سیلاو جملاغی وکیلی جبار شولگری، بو حجت لر محلی دولت ملازملری و امنیتی کوچلر نینگ اشرف غنی احمدزی منفعتیگه تقلب قیلیش حالرینی کورسته دی دیب ایتگن.

اونینگ ایتیشیچه آشکار ایتلگن حجتلر، ایککینچی دور سیلاو لرده تقلب حاللری منتظم و ترتیب لنگن بیر شکلده عملگه آشیرلگنی گه گواه دیر.

شولگری جنابلری نینگ ایتیشیجه ساخته کارلیک لر اون و یا 20 کیشی تمانیدن عملگه آشیرلمه گن بلکی آلدین دن ریجه لنگن و سیلاو کمیسیونی تمانیدن یولگه قوییلگن .

او ینه بیر بار اوز مقامیدن استعفا قیلگن ضیا الحق امرخیل نینگ ساخته کارلیک لرنی یولگه قویگن ترماغگه باشقاش بولگنینی ادعا قیلگن.

جبار شولگری ایککینچی دور سیلاو لرده تقلب حاللر نینگ یوز بیرگنیگه دایر قوشیمچه حجت لرگه ایگه بولگن لرینی ایتیب یقین کیلجکته بو حجت لرنینگ آشکار ایتلیشنی معلوم قیلگن.

عبدالله عبدالله سیلاو جملاغی تمانیدن آشکار ایتلگن ینگی ویدیو تسمه ده امنیتی کوچلر کیمیده بولگن شخص لر سیلاو صندوق لرینی گویا کی اشرف غنی احمدزی جناب لرنینگ فایده سیگه تولدره یاتگنی عکس ایتگن.

بو ویدیو تسمه نینگ قییرده تصویرگه آلینگنی معلوم ایمس.

عبدالله عبدالله طرفدار لرنینگ ادعا قیلیشیچه ایکینچی حجتده وردک ولایتی حاکمی مجید خوگیانی و ملی اوردو کوچلرنینگ بیر قوماندانی آره سیده گی صحبت عکس ایتگن. اولرنینگ دعوا قیلیشلریچه بو صحبتده ولایت حاکمی ، امنیتی کوچلرقوماندانیدن اشرف غنی احمدزی نینگ وردک ده کی وکیلی بیلن علاقه قوریب معما لرنی ایچیشنی سوره گن .

شولگری جنابلری عینی دمده، خلق تقلب حاللری اساسیده قورلگن حکومت نی ایستمه سلیکلرینی ایتیب، اشرف غنی احمدزی گه بیرلگن آواز لرعبدالله عبدالله گه بیرلگن آواز لرنینگ یرمیچه هم ایمس دیب تاکید له گن .

عبدالله عبدالله سیلاو جملاغی بوندن اولراق مستقل سیلاو کمیسیون نینگ سابق کاتبی ضیاالحق امر خیل نینگ سیس دیب ادعا قیلنگن سیس تسمه نی آشکار قیلگن ایدی. نهایتده امرخیل جنابلری اوز مقامیدن استعفا قیلدی. او بو قرارگه ملی منفعت لرنی نظرگه توتگنینی ایتگن.