هلمند ده ماين ملي اردوگه 85 فايز تلفات ييتكزگن

افغانستان مدافعه وزيرليگي هلمند ولايتيده اون كوندن بيري ملي اردو و قوراللي طالبان اورته سيده دوام ايته ايتگن جنگ ده كته تلفات كورگنيني ايتگن.

بو وزيرليك بونگه طالبان تمانيدن يول چيككه سيده سان ـ سناقسيز شكلده اورنه تيلگن ماينلرني سبب قيليب كورستگن. خبرلر گه كوره، يول چيكه سيكه اورنه تيلگن ماينلرده عادي اهاليگه هم تلفات ييتگن. افغانستان دولتي مذكور ماينلرني بيكار قيليشگه ايش باشله گن، اما ييترلي درجه ده جهازلر موجود بولمه گني ني ايتگن.

هلمند ده اوروش بوندن اون كون مقدم باشلندي. حاضرهم دولت كوچلري و قوراللي طالبان اورته سيده شدت بيلن دوام ايتماقده. بو اوروش هلمند ولايتي نينگ سنگين و نوزاد تومنلريده باشلنگن. مذكور تومنلر اهاليسي اوز اوي جايلريني ترك ايتيب، تينچ منطقه لر گه قاچيشگه مجبور بوليشگن. اما افغانستان ملي مدافعه وزيرليگي مذكور جنگده ملي اردوكوچلريگه ييتگن 85 فايز تلفاتلر يول چيككه سيگه اورنه تيلگن ماينلر سببچي بولگنيني ايتماقده.

ايچكي ايشلر وزيرليگي مذكور جنگده 150 جنگري نابود قيلينگن و كميده 90 دن آرتيق يره لنگن دييدي.

اونگه كوره، بو هجومده 30 ته پوليس اولگن و باشقه 40 ته سي تن جراحتي آلگن.

اما مدافعه وزيرليگي ايسه، مذكور جنگده حاضرگه قدر 25 عكسر اوليب يره لنگني ني ايتگن. بو اوروش ده عادي اهالي گه تلفات ييتگ. خبرلرگه كوره، كميده 30 نفر تينچ اهالي اوليب يره لنگن.

مدافعه وزيرليگي سوزچيسي ظاهر عظيمي نينگ اوز تويتر صحيفه سيده يازيشيچه، اوتگن 48 ساعت ايچيده اون نفر عسكر يول چيككه سيكه اورنه تيلگن ماينلرده حياتيني يوقاتگن.

ظاهر عظيمي نينگ اورين باسر دولت وزيري نينگ بي بي سي بيلن صحبتيده،هملند و لوگر ولايتلريده گي سونگي جنگلرده افغان كوچلري گه يولگه چيكه سيكه اورنه تيلگن ماينلر قتيق ضربه اورگن دييدي:”قوراللي مخالفلرنينگ منتظم هجوملريده بيزگه انچه هم تلفات ييتمه يدي. بيز كوپراق مايندن تلفات كوره ميز. ملي اردوگه ييته ديگن تلفات دن قريب سكسن فايزيني ماين تشكيل بيره دي. دشمن بيز بيلن توغريدن توغري جنگ قيليشگه قادر ايمس. فقط ييرگه اورنه تيلگن ماينلر بيزگه تلفات ييتكزه دي”.

افغانستان دولتي گه كوره، قوراللي مخالفلر ماينلرني تشقريدن قولگه كيريته ياتگني گه قره مه ي، افغان كوچلري گه قرشي اوزلري هم يول چيككه سيگه اورنه تيله ديگن ماينلرني قولده ايشلب چيقه ره ديلر.

حاضرگي كونده افغانستان ده ايچكي و خارجي ييتي ماين تازه لووچي تشكيلات كميده اون اوچ مينگ خادم بيلن ماينلرني تازه لش ايشلري بيلن بند.

اوتاوا كيليشوونامه سيگه بنآ، افغانستان 2013 ييلگه قدر ماين دن تازه لنيشي كيره ك ايدي، اما ماين تازه لووچي تشكيلاتلر گه كوره، اولر خوفسيزليك وضعيتي يامانليگي سبب، مقصدگه موافق ايشلرني عملگه آشيره آلمه گنلر.