اروپا اوزبیک-ترکمن و افغان چیگره لریده بازار اچماقچی

Image caption کوپچیلیک بو کوپریک سودا-ساتیق بیلن گوچوم له نیشنی ایستیدی

اروپا اتفاقی شمالی افغانستان و مرکزی آسیا اورته سیده گی سودا- ساتیقنی کوچیتیریش لایحه سینی ینگی باسقیچیگه آلیب چیقیشنی ایتماقده.

شمالی افغانستان چیگره سینی باشقه ریش ناملی موجود لایحه نینگ ینگی باسقیچیده اوزبیکستان و ترکمنستان بیلن چیگره آشه سودا نی یولگه قویشماقچی.

اروگا اتفاقی بیاناتیگه کوره، اینده لیکده چیگره خذمتلری همکارلیگی و تجاری علاقه لر کوچیتیرله دی.

نتیجه ده ایسه تجارلر، چیگرهدن اوتووچی یولاوچی سیاح لر همده شمالی افغانستان اهالی سی کته فایده کوره دیلر.

منطقه ده گی یاپیق و چیگره آشه کیچیک همده اورته سودا نی قتیق نظارتگه آلیب کیله یاتگن اوزبیکستان و ترکمنستان نینگ مذکور لایحه گه جلب ایتیلیشی افغانستاننی مرکزی آسیا بیلن اویغون لشتیریش یولیده گی ییرک قدم کورینه دی .

نیگه کی، هله قچان تاجیک-افغان چیگره لری بویلب باشلنگن ایلک باسقیچده سودا-ساتیققه کته اعتبار قره تیلماقده.

لیکن اقتصادی رشته لرنی کوچیتیریشی اوز آرا تور المه شیش، تجارلرنینگ چیگره لردن اوتیب قیتیش و ملی پوللرنینگ ایرکین المه شیشنی تقاضا ایتدی. اوزبیکستان ایسه بوندی شرط-شرایط لرنی قنچه لیک تامین لیدی- انیق گپ ایتیش قیین.

عکسینچه، ناتو چیقیب کیتیشی آرتیدن افغانستان نینگ ناتینچ له نیشی احتماللری کوچیرکن، تاشکنت هم، عشق آباد هم اوز جنوبی چیگره لرینی ینه ده قتیق راق نظارت قیلیشگه کیریشیشلری احتمالی کتته.

افغانستان نینگ شمالی امکانیتلری

عینی دمده، غربده گی قطار کوزه توچی لر افغانستانی عینن دنیوی و نسبتا تینچ مرکزی آسیاگه اویغون لشتیریشنی هم ایسته شه دی. اوزاق ییللر فقط ایران و پاکستان بیلن باردی- کیلدی همده سودا-ساتیق قیلیب کیلگن افغانستان کوپ جهتدن بوایککی دولتگه یقینله شیشگن.

کابل ده حکومت اوچون مصلحت چی لیک قیلگن امریکا لیک تاریخچی عالم تماس بارفیلد، مثلا مرکزی آسیاگه یقینله شیش افغانستاننی اولکن مدنی همده اقتصادی یوتوقلر سری باشلیدی دیگن فکرده.

لیکن اوزبیکستان افغانستان و پاکستان ده یشیرینگن اوزبیک جنگری لریدن خواطرلری باعث اوز جنوبی دروازه لرینی کتته آچیشگه شاشیله یاتگنی یوق.

افغان تجارلری اوچون اوزبیکستان ویزه سینی آلیش اوته قیین.افغانستانده گی اوزبیکلر سیاح صفتیده بخارا یا سمرقندنی کوریش آرزو لری کوپلیگنی، لیکن ویزه آلیش عادی آدملر اوچون دییرلی امکان سیزلیگنی ایتیشه دی .

شونگه قره مسدن، ترمز-حیرتان چیگره اوتیش مسکنی افغانستاننی تشقی دنیا بیلن باغلیدیگن ایککیته ییرک یولدن بیریگه ایلهندی.

مملکت اوچون اوته مهم محصولات لرنینگ یرمیدن کوپی عینا شو یول آرقه لی کیلیشی ایتله دی .

آلمانیا قولاوی و آسیا بانکی یاردمی بیلن اوزبیکستان ترمزدن تا مزارشریف شهریگچه تیمر یول یاتقیزدی.

اوشبو تیمر یول افغانستانده گی غرب کوچلری و ییرک تجارلر همده دولت مقیاسیده گی تجارت اوچون کتته اینگلیک یرتگن.

اما مرکزی آسیا دولتلری آره سیده گی ترنگ مناسبتلر و ساووقچی لیک باعث منطقه نی افغانستانگه آلیب چیقه دیگن یوللردن ثمرلی فایده له نیب بولمیپتی.

تاجیکستان و ترکمنستان، مثلا اوزبیکستاننی ایله نیب اوتیب افغانستان آرقه لی اولرنی اوزآرا باغلیدیگن تیمر یول قوریشگه کیریشگنلر.

اقتصادچی لرنینگ اویله شیچه، اوزبیکستان نینگ خوف سیزلیک خواطرلری مملکت نینگ منطقه وی سودا ساتیق و تجارتگه توله قوشیلیشگه توسقین لیک قیلماقده.

شونگه قره می، اکثر قوشون لری بیلن چیگره آشه باردی- کیلدینی کیسکین چیکله یاتگن اوزبیکستان و ترکمنستان حالی یقین آره ده افغانستانگه اوز چیگره لرینی کینگ آچه دی لر، دیب ایشانیش قیین.