کابلده طلبه لرنینگ توقنشگنی مملکت برچه تعلیم درگاه لری نینگ تعطیلیگه سبب بولدی

Image copyright BBCPashto.com

کابل بیلیم یورتی طلبه لری اورته سیده اوتگن کیچه ساعتلر دوام ایتگن توقنه شوو، افغانستان بویلب دولت و خصوصی تعلیم درگاه لری نینگ تعطیل قیلینیشیگه سبب بولدی.

بو توقنه شوو فوتبال اویینیده پیدا بولگن بیر لفظی تارتیشوو عاقبتیده وجود گه کیلگن، کیین یاتاقخانه ده توقنه شوو دوام ایتگن.

بو توقنه شوو آرتیدن، افغانستان عالی اوقوو وزیرلیگی مملکت بویلب تعلیم درگاه لرینی تعطیل قیلگن.

افغانستان عالی اوقوو وزیرلیگی معاونی عثمان بابری نینگ بی بی سیگه ایتیشیچه، دولت تعلیم درگاه لریدن باشلب خصوصی تعلیم موسسه لری هم باشقه بیر آیگه قدر تعطیل اعلان قیلینگن.

او، بونگه رمضان آیی، هوا ایسیقلیگی و خوفسیزلیک مسله لرنی عامل قیلیب کورستگن.

افغانستان ده 34 دولت بیلیم یورتی و 82 خصوصی تعلیم موسسه فعالیت قیله دی.

عالی اوقوو وزیرلیگی مسووللری تعطیل ینگی حکومت ایش باشله گونچه دوام ایتدیریلیشینی ایتگن.

کابل بیلیم یورتیده طلبه لر اورته سیده وجودگه کیلگن توقنه شووده 23 طلبه یره لنگن و بولردن 19 ته سی دوالنیب رخصت قیلینگن. اما باشقه تورته سی هنوزهم کسلخانه ده یاتقیزیلگنی ایتیله دی.

کابل بیلیم یورتی یقینیده جایلشگن علی آباد کسلخانه رییسی محمد معضوم عزیزی نینگ ایتیشیچه، طلبه لر بیر بیراولری نینگ آتگن تاش و پیچاقلری ده یره لنگن و قورال ایشله تیلمه گن.

بو توقنه شوو آرتیدن پولیس وضعیت نی نظارت گه آلیب، طلبه لرنینگ کیینگی حرکتلرینی توسیشده موفق بولگن.

طلبه لر گه کوره، پولیس اولرگه قرشی کوزدن یاش آغیزدیرووچی گازدن فایده لنگن.

اوتگن ییل هم طلبه لرنینگ کابلده اعتراض بیلدیرگنی، اولرنینگ تعطیلیگه سبب بولگندی.

اما بو مراتبه افغانستان برچه تعلیم درگاه لری تعطیل قیلینگنلیگی سببی معلوم ایمس.