عبدالله عبدالله طرفدارلریدن نهایی قرارآلیش اوچون مهلت آلدی

Image copyright AFP

دستلبکی نتیجه نینگ اعلان ایتیلیشی آرتیدن افغانستان جمهور رئیسلیک سیلاوی نینگ نامزدلریدن عبدالله عبدالله سیلاو تیمی کابل ده ییغین یولگه قویدی.

عبدالله جنابلری بوگون لویه جرگه چادیر آستیده یوزلب طرفدارلری اشتراکیده اویوشتیریلگن اعتراضلی ییغینیده، سیلاو نتیجه سینی رد ایتیب، قلابلیک یوللری آرقه لی اورته گه کیله دیگن حکومت نی قبول قیلمسلیگی باره سیده تاکیدله دی.

او مثلث جمهور رئیسلیک سرای، سیلاو کمیسیونی و اشرف غنی احمدزی نی افغانستان خلقی آوازلریگه قرشی تونته ریش ده عیبله دی. او، بوتون عمرینی افغانستان ملی بیردملیگی سقلنیشی اوچون کوره شگنی نی ایتیب، بو کوره شده دوام ایتدیریشینی معلوم قیلدی.

"مین عدالتلی و باتور خلققه قلابلیک نتیجه نی قبول قیلمسلیگیم باره سیده ایشانچ بیره من" دییدی عبدالله جنابلری

شونینگ دیک اونگه کوره یوزه گه کیله دیگن حکومت خلق نینگ حقیقی آوازی بیلن تشکیل تاپه دی.

عبدالله جنابلری افغانستان خلقی اوندن ینگی حکومت نی اعلان ایتیشنی طلب قیلگن لرینی تیلگه آلدی.

عین حالده عبدالله عبدالله بوگون ایرته لب امریکا تشقی ایشلروزیری جان کیری بیلن تیلغون آرقه لی صحبتلشگنینی طرفدارلریگه معلوم قیلدی.

اونگه کوره، امریکا تشقی ایشلروزیری جمعه کونی افغانستان گه سفر قیله دی. عبدالله جنابلری امریکا ساخته کارلیک آوازلرنی صاف آوازلردن اجره تیلیشیگه طرفدار دییدی.

او، اوزطرفدارلریدن حکومت نینگ اعلان ایتیشیگه نیچه کون مهلت بیریش لرینی سوره دی.

اونینگ ایتیشیچه، افغانستان ده فقطگینه صاف آوازلردن باشقه هیچ بیر نرسه حکومت قیله آلمه یدی.

افغانستان جمهور رئیس لیک سیلاوی نینگ دستلبکی نتیجه سی نیچه کون کیچیکتیریلیب دوشنبه کونی اعلان ایتیلدی.

دستلبکی نتیجه ده اشرف غنی احمد زی 56فایزدن آشه آواز و عبدالله عبدالله قریب 44فایزآوازآلگنی اعلان قیلیندی.

کمیسیون اعلانی آرتیدن عبدالله عبدالله سیلاوتیمی رسانه لرگه بونتیجه نی قبول قیلمسلیگی نی بیلدیریشگندی .

ایکینچی دور بولیب اوتگن جمهور رئیسلیک سیلاویده 8میلیوندن آرتیق کیشی اشتراک ایتگنی ایتیله دی.