جان كيري: ناقانوني حاكميتگه ايريشيش ياردملرنينگ اوزيليشيگه سبب بوله دي

Image copyright AP

امريكانينگ كابلده گي ايلچيخانه سي و مملكت تشقي ايشلروزيري جان كيري تيليدن بير بيانات نشر ايتيب، افغانستانده ناقانوني يوللر آرقه لي حاكميتگه ايريشيش حركتلر امريكانينگ افغانستانگه قيله ياتگن اقتصادي و خوفسيزليك ياردملري نينگ كيسيليب قاليشيگه سبب بوليشي احتمالي باره سيده آگاه لنتيرگن.

بو بياناتگه كوره، افغانستان نا قانوني هر قنده ي يوللر آرقه لي حركتلر و برابر دولت توزيش لايحه سي دنياهمجمعيتي و امريكا نينگ ياردملري اوزيليشيگه آليب كيله دي.

اوتگن كون افغانستان جمهور رييسليك سيلاولري نينگ دستلبكي نتيجه سي اعلان ايتيلدي. سيلاو مستقل كميسيوني نينگ معلوماتيگه كوره، اشرف غني احمدزي يريم آواز دن آرتيق راي كسب ايتگن و عبدالله عبدالله دن آلدين اوتگن.

عبدالله جنابلري سيلاولرده قلابليك عملگه آشيريلگني ني ايتيب، اونينگ سوزچيسي بو نتيجه ني رد قيلگن و بوني اهاليگه قرشي تونته ريش ديه توصيفله گن.

دستلبكي نتيجه لر اعلان ايتيليشي آرتيدن كابلده عبدالله عبدالله طرفدارلري كوچه لرگه چيقيبد اعتراض بيلديردي. اولر كميسيون و قلابليك عاملريگه قرشي شعار بيريشگن و شونينگ ديك، هوا اوق اوزيشگن.

شونينگ ديك، قندهار وهرات ولايتلريده اشرف غني طرفدارلري نتيجه ني خوش قرشيلب، شادليك بيلديريشگن.