گلناره نينگ شيريكلري حكم ايتيلدي

Image copyright Getty

اوزبيكستان دن كيله ياتگن خبرلرگه كوره، جمهور رييس كريموف نينگ تونغيچ قيزيگه شيريك بولگن ايككي شخص بير نيچه ييلليك قماق جزالريگه حكم قيلينگن.

جمهور رييس نينگ تونغيچ قيزي نينگ يقين همكاري بولگن رستم محمدعمروف گه 10 ييلليك قماق جزاسي بيريلگن.

اونينگ باشقه بير شيريگي گنيه اوكين ايسه، باشيده 9 ييلگه حكم ايتيلگن. اما عمومي عفو قول له نيب، 6 ييلليك قماق جزاسي تعيينلنگن.

محكوملرگه يقين منبعلرگه كوره، اولر محكمه قراريگه قرشي شكايت عريضه سي بيلن مراجعت قيليشه دي.

گلناره كريمووه نينگ اوزي حقيده گي سونگي خبرلر ايسه انچه ضديتلي. اوزبيكستان حكومتيگه يقين اوزميترانام. كام ويب صحيفه سيگه كوره، گلناره كريمووه بير نيچه كون آلدين بالتيق بوييده گي بير مملكتده اوز توغيلگن كونيني نشانله گن.

گوگوشه اطرافيده گي ميش ميشلرني كوزه تيب كيله ياتگن منبع لر هم گلناره كريمووه اوزبيكستان ني هله قچان ترك ايتگن ديب ايتيشماقده.

اما اونينگ خارجده يشه ياتگن اوغلي، يعني كيچيك اسلام كريموف اوز آنه سي همان اوزبيكستان ده اوي قماغيده قاله ياتگنيني تاكيدله ماقده.

"ده دا گروهي خواننده سي بولگن رستم محمدعمروف اوتگن ييللر دواميده گلناره كريمووه بيلن جوده يقين تجاري و شخصي مناسبتلرده بولگني ايتيله دي. ايريم ويب صحيفه لرده ايسه اوني حتي گلناره نينگ فقراوي ايري، ديب هم تعريفلشگن.

گه يني اوكين ايسه بير نيچه اوروپا دولتلريده باشلنگن پول يوويش گه عايد ايشلرده نامي تيلگه آلينگن شخص بوليب، گلناره گه باغليق تجارتلرني يوريتگني دعوا قيلينگندي.