افغانستان بیر نیچه شهریده غور حادثه سیگه قرشی اعتراض بیلدیریلدی

بوگون افغانستان نینگ کابل، بامیان، غور، هرات و مزارشریف شهرلریده یوزلب آدم، مدنی فعاللر و ژورنالیستلر سونگی ده غور و پکتیکا ولایتلرده تینچ اهالی اولدیریلگنی گه اعتراض بیلدیرگنلر.

کابلده اعتراضچیلر غور ارگون حادثه لریده گی قربانلر فوتوصورتلرینی کوته ریب، بو اولدیریشلر عامللری تنیلیب محکمه ایتیلیشینی سوره گنلر.

جمعه کونی قوراللی شخصلر غور ولایتیده بیر سرویسده مینگن اون تورت نفر نی جمله دن بیر کیلین و کویاو نی اولدیریشدی. بو اولدیریش مدنی جماعه چیلیک فعاللری و اهالی نینگ غضبلی اعتراضیگه سبب بولدی.

بوگون افغانستان بیرتعداد شهرلریده اهالی، مدنی فعاللر و ژورنالیستلرگه کوچه چیقیب، مذکور حادثه گه عامللریگه قرشی شعار بیریشدی.

کابلده اونلب آدم جمهور رییسلیک سرایی یقینیده جایلشگن زرنگار پارکیده ییغیلیب، حامدکرزی رهبرلیگیده گی حکومت دن قوراللی مخالفلرنی حمایه ایتیشدن قول تارتیشی نی سوره ماقده لر.

اعتراضچیلر نمایش سونگی ده بیر قطعنامه صادر ایتیشدی:":افغانستان دولتی تیزلیک بیلن غور اهالی سی قاتللرینی قولگه آلیب، اولیم جزاسیگه محکوم قیلسین. غور قماقخانه لریدن آزاد ایتیلگن قاتل طالبان نینگ قوییب یوباریلیشیگه قولی بولگن شخصلر بو کته جنایتگه شیریک دیر. بیز هم اولرنی اوشلش و محکمه ایتیلیشیده سعی و حرکت قیلیشیمیز ممکن. افغانستان دولتی مملکت اهالی سی قانیگه آزگینه بها بیره دیگن بولسه، طالب پرورلیک سیاستدن قول تارتیشی کیره ک. خونخوار و صلح گه اعتقادی بولمه گن طالبان تفکریگه قرشی کیسکین ودواملی کوره شیب آلیب باریشی کیره ک".

شوبیلن بیرگه مزارشریفده اعتراضچیلر افغانستان حکومتیدن قربانلر اوچون بیر "خاطره بنا" ایجاد ایتیشینی ایتیب، قوراللی مخالفلر تمانیدن اولدیریلگن برچه قربانلر اسمی کیریتیلیشی نی سوره ماقده لر:"برچه جنایت عمللرینی صادر قیلگن شخصلر هیچ قچان عفو قیلینمه سین. اولرنینگ قانون یوزه سیدن جزالنیشی کیره ک.عکس حالده، بو معما دوام ایته ویره دی. بیز اونده هر کونی جنازه لریمیزنی دفن قیله ویره میز".

هراتده هم نمایش چیلر تینچ اهالی تلفاتی میزانی آشیب باره یاتگنی، تیرور حادثه لری و اینیقسه غورده اون تورت نفر نینگ اولدیریلگنی باره سیده تشویش بیلدیریب، بو حادثه نی قتیق قاره لشدی. ایتیلیشیچه، هرات ده بوگون کیچیرون بیر تعداد مدنی فعاللر قربان لرنی خاطرلش مقصدیده شهرنینگ چهار راهه لریدن بیریده شمع یاقیب قوییشه دی.

غور ولایتیده قوراللی شخصلر تمانیدن آتیب اولدیریلگن کیلین نینگ توغیلگن تومنی لعل و سرجنگل ده هم یوزلب اهالی نمایشگه چیقیب، جمعه کونی روی بیرگن حادثه عامللری تنیلیب، جزالنیشی نی سوره گنلر.

افغانستان مرکزی ولایتی بامیانده یوزلب اعتراضچی اریکین ناملی چهار راهه سیده توپله نیب، غور حادثه سی قربانلری گه قیغوداشلیک بیلدیریب، عامللرگه قرشی شعار بیریشدی.

عین حالده، بوگون افغانستان جمهور رییسلیک سرایی بیر اعلامیه ده جمهور رییس کرزی غور حادثه تیکشیریلیشی اوچون هییت تعیین ایتگنی دن خبر بیرگن.

اوتگن بیر نیچه کون ایچیده افغانستانده اجتماعی ترماغلردن فایده لنووچیلردن بیرتعدادی هم غور و ارگون حادثه سی قربانلری جسدلری نینگ صورتلری نی قوییب، اعتراضلرینی بیلدیرماقده لر.