ناتو یغینیده اشتراک ایتیش اوچون کابلده تیارگرلیک یغینی اوتکزیلدی

Image copyright BBC World Service

یوقاری مرتبه لی افغان مقاملری و اکثری تشقی مملکت لر ایلچی لری افغانستان احتیاجلرینی تیکشیریش اوچون بوگون کابلده بیریغین اوتکزدی، افغانستان اوچون بریتانیا ده بولیب اوتیشی کوتیله یاتگن ناتو یغینده تیارگرلیک کوریش مقصدی بیلن بو یغین یولگه قوییلگن.

افغان مقاملری مذکور یغینده ناتو اعضالگیده بولگن دولت لردن ینگی طلب لرنی ایلگری سورگن.

افغانستان خصوصیده اوتکزیله دیگن ناتو یغینی کیله جک میلادی آی اوللریده بریتانیاده یولگه قوییلیشی ریجه لشتیریلگن. افغان مقاملری بو یغینده ایلگری سوره جک ینگی طلب لری باره سیده یاردمچی مملکت لر اعتبارینی جلب ایتیش اوچون سعی قیلماقده.

افغان امنیتی کوچلری نینگ جهازلنتیریش وبوخصوصده بیریله یاتگن یاردملر میزانینی آشیریش ینگی طلب لردن بیرینی تشکیل بیره دی.

افغان مقاملریگه کوره، بوندن قریب بیر یریم ییل آلدین امریکا ده بولیب اوتگن ناتو اعضالیگیده گی دولت لر یغینیده افغان امنیتی کوچلری خصوصیده آلینگن قرار بو کوچلر احتیاج مندلیک لرینی برطرف ایته آلمیدی. شیکاگو جلسه سیده هرییلی افغان امنیتی کوچلریگه 1.4 میلیارد دالر بیریلیشی وعده قیلینگن ایدی. ایندیلیکده افغانستان دولتی امنیتی کوچلر اوچون ارتیق یاردم طلب قیلماقده.

مقاملرگه کوره ، امنیتی کوچلر سانی 220 مینگ دن 350 مینگه کوپیگن. افغانستان مالیه وزیری حضت عمر ذاخیل وال حاضرگه قدر افغان امنیتی کوچلری اوچون هرییلی بیش یریم و یا آلتی میلیارد دالرگه احتیاجی بارلیگینی ایتدی.

"افغان امنیتی کوچلر اوچون هرییلی بیش یریم ویا آلتی میلیون دالرکیره ک بولیشی ممکن یغینده بومساله بحث گه آلینه دی.جاری ییل سیپتمبر آی نینگ تورتینچی سیده انگلستان ده بولیب اوتیشی ریجه لنگن ناتو یغینیده بو رقم ایلگری سوریله دی ." دیدی افغانستان مالیه وزیری عمرذاخیل وال.

شونینگدیک ذاخیل وال جنابلری هوای کوچلرنی جهازلنتیریش یریم ایشلنگن حربی تاسیسات مرکزلرینی قوریش اوچون یوزلب میلیون امریکا لیک دالر کیره ک لیگینی اورغوله دی. اونگه کوره، بو مساله هم ناتو یغینیده ایلگری سوریله دیگن طلب لرنینگ باشقه بیرقسمی. همده او، بو طلب لری ناتو اعضالیگیده بولگن دولت لرتامانیدن قبول قیلنیشی گه امید بیلدیردی.

هرچند افغانستان جمهورریسی حامدکرزی جاری میلادی آی آخرلریده جمهوررییسلیک سیلاو نتیجه سی اعلان قیلینیب ینگی جمهورریس اوز ایشیگه باشله شینی تاکیدلب کیلماقده، اما ناتو یغینیدن آلدین سیلاولرگه عاید جنجاللر حل بولمه یشی ممکن دیگن خواطرپیدا بولگن.

بیراق افغانستان مالیه وزیری هیچ کیم دن آت توتمی بولیب اوته جک ناتو یغینده افغانستان دن وکالت لیک بولیشی ممکن لیگینی ایتدی.

بوندن الدین ناتو باش کاتبی اندرس فو راسموسن ناتو یغینیدن الدین سیلاولرمعماسی حل بولیب ینگی جمهوررییس امنیتی پیمان گه امضا قوییمه سه، افغانستانده فعالیت آلیب باره یاتگن چیت ایللیک کوچلرنینگ بوتونلی چیقیب کیتیش مساله سی ناتو یغینیده کوریب چیقیلیشی ممکن لیگینی تیلگه آلگن ایدی.