بلخ ولايتيده نابالغلرني نكاح قيلگن عامللر حبسگه آليندي

بلخ ولايتي پوليس اداره سي بوندن تورت كون آلدين شولگره تومنيده نكاح قيلينگن قيزچه و اوغيل باله نينگ عايله اعضالريني حبسگه آلگنيني ايتگن.

اما بلخ ولايتي عياللرگه قرشي زوره وانليك ني منع ايتيش بوييچه قاره لاوچيليك اداره سي بوحادثه ده نكاح باغله گن مولوي عيبدار ايكنيني تاكيدله گن.

8 يشر مينه و 12 يشر سردار اوتگن جمعه كوني بلخ ولايتي شولگره تومنيده نكاح قيليندي. اما اوتگن كون كيچقرون پوليس اولرني عايله اعضالري بيلن حبسگه آلدي. بوحقده بلخ امنيه قوماندانليگي سوزچيسي شيرجان دراني:"قيزچه نينگ آته سي و اوغيل باله نينگ آنه سي ني وباشقه اعضالريني قضيه عامللري صفتيده حبسگه آليب دوسيه لري تيكشيريليشي اوچون عياللرگه قرشي زوره وانليك ني منع ايتووچي سارنوالليك اداره سيگه تاپشيرديك".

دراني گه كوره، اولر بو قضيه دن خبردار بولگني آرتيدن، قيزچه و اوغيل باله نينگ عايله اعضالريني قولگه آليشگه حركت قيليشگن.

اما بلخ ولايتي عياللرگه قرشي زوره وانليك ني منع ايتيش بوييچه قاره لاوچيليك اداره سي رييسي فوزيه حميدي، بو قضيه ده نكاح قييگن مولوي عيبدار ايكني ني تاكيدله يدي:"آته سيني دوسيه تكميل بولگونچه قماققه تشله ديك، قيزچه و اوغيل باله ني آنه سي بيلن دوسيه لرني بيز بيتكزگونگه قدر عياللر اداره سيگه يوبارديك.او ييرده سقلنماقده لر. دوسيه لري تكميل بولگن دن كيين قانون اساسيده اولرنينگ باره سيده قرار قبول قيلينه دي. اما بو ييرده قيز بيلن اوغيل ني نكاح قييگن مولوي عيبدار. بيز بلخ ولايتي قوماندانليگي و شولگره تومني مسووللري گه مولوي ني تيزليك بيلن حبسگه آليشگه دستور بيرديك".

قاره لاوچيليككه كوره، بو ايكله نابالغ نينگ باغلنگن نكاحي بيكار قيلينگن.

اونينگ ايتيشيچه، 8 يشر مينه ني آته سي اوني كمبغلليك و بي سرپرستليك سبب، 12 يشر سردار اسملي باله گه بير ليگ و اون يعني ايكي مينگ دالرگه ساتيشگه مجبور بولگن.

قاره لاوچيليككه كوره، قيزچه نينگ آنه سي بوندن بيش ييل مقدم اويدن قاچيب، بيدرك يوقالگن، شومسله سبب، اونينگ آته سي قيزيني سينگليسي نينگ اوغيليگه ساتيب، اونينگ پوليگه قيته دن تورموش قورماقچي بولگن.

بلخ ولايتي عياللرگه قرشي زوره وانليك ني منع ايتيش بوييچه قاره لاوچيليك اداره سي رييسي نينگ ايتيشيچه، ايلك بار دير كه بولايتده نابالغ قيز نابالغ اوغيل باله گه نكاح قيلينگن.

افغانستانده نابالغ قيزلرني زوردن تورموشگه چيقه ريش يا اونيشتيريب قوييش حاللري آز ايمس، اما بولردن اكثريتي مطبوعات گه چيقه ريلمه يدي. مينه و سردار زوردن نكاح قيلينگن نابالغ باله لردن بيرنمونه.