حماسه نوا عزیزی: ای آنم اوشبو جهان ده مهربانیم سین اوزینگ

اندخوی لیک چاری خان قیزی حماسه نوا عزیزی 1368 ییل فاریاب ولایتی نینگ اندخوی تومنیده دنیا گه کیلدی. او باشلنغیچ و اورته مکتبلرنی اندخوی نینگ یولدوز قیزلر لیسه سیده عالی درجه ده بیتیردی.

حماسه مکتب نی بیتیرگنی دن سونگ، بیر مدت اندخوی یولدوز لیسه سیده اوقیتووچی صفتیده وظیفه بجردی.اوندن کیین، تحصیل نی دوام ایتدیریش مقصدیده، اندخوی معلم تربیه لش عالی موسسه سیده اوزبیکی دیپارمنتیده محصل بولیب تعلیم آلماقده.

حماسه باله لیکدن ادبیات و شعرگه قیزیقیب کیلگن. شو قیزیقیش اونی شاعرلیککه و شعر یازیشگه یول له دی. او اوزبیک و دری تیللریده شعر یازه دی.

قوییده گی شعرلر اونینگ ایجادیدن نمونه سی:

ایزگو بهار

نسترن بیرله بوکون ایزگو بهار ایسترکونگل

دشت و صحرالرنی کورکم لاله زار ایستر کونگل

جلوه ایلب پرده دین کورسات جمالینگ یاسمن

قامت و قدینگ کوریش نی بار بار ایستر کونگل

آلمه سین ایمدی کونگل اوراقیده غم گردی جا

ایل اولوس شادمان و شاندار ایستر کونگل

شکر الله دانش و عرفان گه صاحب بیز بوکون

دانش و تعلیم باغین چون بهار ایستر کونگل

بلبل شایان نوا شقایق قاشیده

اونگه گلشن اچیره گلدیک غمگسار ایستر کونگل

آنم

ای آنم اوشبو جهان ده مهربانیم سین اوزینگ

غمگساریم ، مونسیم ، جسم ایچره جانیم سین اوزینگ

مهرلی قوینینگده ایلب تربیت لطفینگ ایله

اویقوکورمی الله ایتگن نغمه خوانیم سین اوزینگ

سوزله گن پیتینگده سوزینگدین بسی در ساچیلور

آشکار ایتسم حقیقت نکته دانیم سین اوزینگ

گر اوزاق توشسم کوزینگدن ایزله بان هریان چاپیب

التجا ایلب مینی یوقلیدیگانیم سین اوزینگ

ایلرم آنم یولینگده مین نوا بلبل کبی

دهر ارا مینگه بهشت جاویدانیم سین اوزینگ

******

ای دیاریم مسکنیم افغانستان دیرلر سینی

معدن و کانینگ نی هرآن درفشان دیرلر سینی

کوز آچیب کیلدیم ینه بغرینگده تاپدیم مین کمال

هر بیر اولادینگ یولینگده پاسبان دیرلر سینی

تاغ و تاشینگ در ایرور همده گهر افغان لره

شهرتینگ آوازه سین تا کهکشان دیرلر سینی

سویی صاف قویاشی یارقین توپراغی آلتین گه ماس

یولدوزی نور بیرله تولگن آسمان دیرلر سینی

سینده علم و معرفت نی رشته سین بیرگی ثمر

علم و دانش مهدی دورسن علم کان دیرلر سینی

قدکوتارگن قنچه لب سینده اوقویورت لر بوکون

معرفت باغیده کورکم گلستان دیرلر سینی

ای نوا تیبرت قلم وصفیده دایم کویله گیل

کیم ایرور وصفینگه یازگن داستان دیرلر سینی

معلم

معلم ایل اراسیده صداقت لیک بیر انسان سن

بیلیم دنیاسیده سیرانه بولگن اول خوش الحان سن

جهان ده کیکسه و یاشلر سینی پندینگ نی آلگی لر

معلم سن وجودینگ برچه لرگه دارو درمان سن

یورک گه جا قیلور میز نکته – نکته علم و عرفان نی

وطن اولادیگه هر ییرده بولسنگ فخر دوران سن

مقامینگ درخور حرمت حضورینگ باعث شوکت

حقیقت سویله سم گر من معلم کان احسان سن

معلم مایل ایلر برچه لر نی راست یول لرگه

اوقوچیلر دلی نینگ یارقین ایتگن ماه تابان سن

کوزیمیز هم دلیمیز دن جهالت لیک نی یوق قیلگچ

اولوس گه واقعی خدمتگذار و جسم ارا جان سن

وطن اولادیگه هردم بیریب درس وطندوست لیک

قوانگی دور نوا بولکون منم اهل معارف دیب

دعا و مغفرت ایلب خداگه سین ثنا خوان سن