كرزي: صلح ناميگه الدنديك، رباني شهيد بولدي

Image copyright Getty

برهان الدين رباني بوندن اوچ ييل مقدم سله سيگه پارتلاوچي ماده ني اورنتگن شخص تمانيدن اولديريلدي.افغانستان جمهور رييسي حامدكرزي صلح نامي گه الده نيب، تينچ ليك عالي كينگشي رييسي برهان الدين ربانيني قولدن بيرگنيني ايتدي.

جمهور رييس كرزي اوشبو مطلب ني بوگون باني نينگ اوچينچي شهادت ييلليگي مناسبتي بيلن اوتكزيلگن مراسمده تيلگه آلدي. اونگه كوره، رباني صلح اوچون يوگوردي و صلح ديب كيلگن شخص تمانيدن تيرور قيليندي.

كرزي جنابلري رباني ني خبير و وطن سيور شخصيت اتب، قندهارده اوكم احمدولي كرزي نينگ شهادتي دن 20 كون آلدين ملا محمد عمر شامل طالبان بويوكلري طلح گه قوشيله دي ديب ميني هر تماندن بير كنفرانس آرقه لي صلح اعلان قيليشگه مجبور قيليشدي.

كرزي بو مسله ني استاد رباني گه ايتديم، او احتياط بولينگ بو بير فتنه ديدي، دييدي. اونينگ ايتيشيچه، اوكم قندهار ده شهيد بولگندن سونگ، بو نينگ فتنه ليگي ني سيزديم، چون مين بوندن آلدين صلح موفقيتلليككه ايريشدي ديب اعلان قيلگنديم، دييدي.

او، طالبان باشليقلري افغانستان گه كيليب، صلح گه قوشيله دي ديگن فكر ده بولگن.

كرزي جنابلري مراسم اشتراكچيلريگه سيلاو نامزدلري جنجللرني يكون بيريش اوچون ، جهاد رهبرلري اشتراكيده تدبير كوره ياتگنيني ايتدي.

اونگه كوره، بوگون جهاد رهبرلري و نامزدلر جمهور رييسليك سرايي ده ييغين اويوشتيريب، ايكله نامزد ني ملي بيردمليك حكومت تشكيل ايتيشگه ترغيبله يدي.

جمهور رييسليك نامزدلري فقط حكومت تشكيل ايتيش جهتلري باره سيده كيليشيب آلالمه گنلر.

ايتيليشيچه، نامزدلر كيليشيب آليشي بيلن ايرته نتيجه اعلان ايتيله دي.

كرزي جنابلري 1375 ييلده طالبان نينگ كابلگه قيلگن هجومي آرتيدن رباني حكومتي قوله گني باره سيده توختلدي و رهبرلرني اولديريش ني كبيره گناه ديب اته دي.