عبدالله عبدالله ینگی حکومت نینگ اجرائیه رئیسی

Image caption عبدالله عبدالله

یکشنبه کونی سیلاولر مستقل کمیسیونی رهبری یوسف نورستانی تاماندن عبدالله عبدالله ملی بیردملیک حکومت نینگ اجرائیه رئیسی بولگنی اعلان ایتدی.

عبدالله جنابلری 55یاشده بولیب، کوزبوییچه کابل بیلیم یورتی فاکولته سیده تحصیل آلگن.

او، پنجشیرلیک، آنه تیلی دری وآته سی ایسه قندهارلیک پشتون ملتی گه منسوب. عبدالله جنابلری اوتگن ایکی دهه ده سیاسی صحنه ده فعال حصه قوشگن کیشی لردن بیری. واوتگن بیردهه ده حاضرگی دولت نینگ اپوزیسیونینی رهبرلیک قیلگن.

عبدالله عبدالله هجری قویاش 1363ییل قوشنی پاکستان گه یول آلیب مجاهدلرگروه لریگه قوشیلدی. تیزآره ده برهان الدین ربانی رهبریتی ده بولگن اسلامی جمعیت ایشانچی نی کسب قیلیب وبوحزب نینگ یوقاری مرتبه لی مهم رهبری احمد شاه مسعوداعتبارینی جلب ایتدی.

طالبان بیلن اوروش دوام ایته یاتگن بیرپیتده او برهان الدین ربانی دولتی نینگ تشقی ایشلروزیری ایدی.

ومیلادی 2001ییل احمد شاه مسعود قتل ایتیلیشی آرتیدن خلق ارا رسانه لرگه طالبان گه جبهه توزگن جریان آدرسیدن وکیل بولیب گپیردی. مجاهدلر غلبه سی دن سونگ هجری قویاش 1371ییلدن 1375ییل گچه احمد شاه مسعود مدافعه وزیر بولگن پیتده مدافعه وزیر سوزچیسی بولیب خذمت قیلگن.

طالبان قوله تیلیشی دن کیین بن ییغینی شرطنامه سی گه اساسن او حامد کرزی رهبرلیگیده بولگن وقتینچه لیک واوتیش دورحکومت لریده تشقی ایشلروزیری بولیب تعیین لندی. اما عبدالله جنابلری هجری قویاش 1383ییل حامد کرزی حکومتی کابینه سیده یول تاپه آلمه دی ودولت دن چیتده قالگن.

اوتگن ییللر دوامیده حامد کرزی نینگ تنقیدچیسی بولیب قالدی. وکرزی رهبریتی ده بولگن دولت نی فسادگه باتگن لیککه عیبلب وتغییروامیدنامیگه بیرسیاسی اتفاق توزدی.

میلادی 2009ییل ده بولیب اوتگن سیلاوده حامد کرزی بیلن رقیب بولیب بیللشدی. اما او سیلاوکمیسیونیگه ایشانچسیزبولگنی نی ایتیب ایکینچی دوربیلله شیشگه حاضربولمه دی.

میلادی 2009ییل بولیب اوتگن جمهور رئیسلیک سیلاوده پارلمانی تیزیم برقرارله نیشی اونینگ اساسی ایستک لریدن بیری ایدی.

ومیلادی 2014ده هم اونینگ اساسی شعاری قدرت مرکزلشتیریلمی بلکی محلی حکومت لرصلاحیتی آشیشی ایدی.

ملی بیردملیک حکومتی یوزه گه کیلیشی اوچون او بیلن اشرف غنی احمدزی اورته سیده امضالنگن شرطنامه ایسه ایریشیلگن سیاسی کیلیشوونتیجه سی بولگن.

عبدالله جنابلری اجرائیه رئیسی بولیب ودولت کیلگوسی ایکی ییل دن کیین لویه جرگه نی یولگه قوییب باش وزیرلیک لوازمی ایجادایتیش مقصدیده جرگه تصدیقی دن اوتیش اوچون آوازگه قوییله دی.

عبدالله جنابلری 16حمل بولیب اوتگن افغانستان جمهوررئیسلیک سیلاویده 44.9فایزآوازآلیب یوقاری اوریننی ایگلله گندی.

24جوزا بولیب اوتگن جمهور رئیسلیک سیلاوی نینگ ایکینچی باسقیچیده او سیلاوده کینگ ساخته کارلیک بولگنی باره سیده اعتراض بیلدیریب وطرفدارلری ایسه ناراضیلیک اویوشتیریب کوچه لرگه چیقیشدی.

وسیلاولرمستقل کمیسیونی نی رقیب نامزدی منفعتی گه ساخته کارلیک قیلگن لیککه عیب له دی.

عبدالله جنابلری اعلان ایتیلگن سیلاونینگ دستلبکی نتیجه سینی قبول قیلملسیگی نی معلوم قیلیشی آرتیدن امریکا تشقی ایشلر وزیری سفرقیلیب ایکله نامزد برچه آوازلرنی قیته تیکشیریلیشی باره سیده کیلیشدیلر.

نهایتده حامد کرزی، امریکا وبیرلشگن ملت لرتشکیلاتی واسطه چیلیگی بیلن رقیب نامزدی اشرف غنی احمد زی بیلن ملی بیردملیک حکومتی نی تشکیل ایتیش اوستیده کیلیشیب ومذکور حکومتده اجرائیه لوازمینی قبول قیلدی.