احمدزي وعبدالله لرنينگ كيليشوويني امريكا، بيريتانيا ویوناما خوش قرشيله دي

Image copyright ARG

بيرلشگن ملتلر تشكيلاتي نينگ افغانستانده گي وكالتخانه سي ايكله نامزد تمانيدن امضالنگن ملي بيردمليك كيليشوونامه سي ني سياسي تينچليك وبرقرارليككه تمان بير ينگي حركت ايكنيني اعلان قيلگن.

بو اداره تمانيدن نشر ايتيلگن خبرنامه ده، بي مي تي نينگ افغانستان اوچون مخصوص نماينده سي يان كوبيش سونگي بير نيچه آي ايچيده سياسي نابرقرارليكلر اقتصاد، خوفسيزليك و حكومتدارليك گه آغير تاثير اوتكزگنليگي ني ايتگن.

اونگه كوره، بو كيليشوونامه تيزآره ده عملده جاري قيلينيب، بيرلشگن ملتلر تشكيلاتي افغانستان دولتي ني حمايه قيليشي كيره ك.

آق اوي هم اوز اعلاميه سيده، امريكا دولتي ملي بيردمليك كيليشوونامه سيني خوش قرشيله گن. آق اونينگ تاكيدلشيچه، بو كيليشوو افغانستان نينگ سياسي اداره لريني كيله جككه نسبتآ ايشانچيني مستحكمله يدي.

آق شونينگديك، افغانستان ني رواجلنيشي اوچون كوپراق همكارليك قيليشي باره سيده تاكيدله گن.

بيريتانيا نينگ كابلده گي ايلچيخانه سي هم بير خبرنامه آرقه لي ايكله نامزدنينگ كيليشوويني تحسينلب، اوني جنجللرنينگ يكوني ديه تاكيدله گن.

بيريتانيا ايلچيخانه سي نينگ خبرنامه سيده، مذكور كيليشوونامه افغانستان ده حاكميت ني تينچ و دموكراتيك يوللر بيلن تاپشيريش زمينه سي مهيا قيليشي قيد ايتيلگن.

بو خبرنامه نينگ باشقه بير بوليميده، افغانستان ينگي دولتي مردم ني آسايشته ليك و حياتي يخشيلنيشي گه خذمت قيليشي باره سيده اميد بيلديريلگن.

بو كيليشوونامه اساسيده، ايكله نامزد ملي بيردمليك دولت تشكيل ايتيب، قدرت ني تينگ شكلده تقسيم قيليشي ممكن.