افغانستان قضاييه قوه سي ينگي جمهور رييس نينگ قضاده فساد حقيده گي اظهاراتيني رد ايتدي

افغانستان عالي محكمه سي مملكت ينگي حمهور رييسي نينگ تحليف مراسمي آرتيدن اشرف غني احمدزي نينگ افغانستان قضايي اداره لريده فساد بارليگي حقيده گي اظهاراتيني قتيق رد ايتگن.

افغانستان عالي محكمه سي كينگشي ييغيني سه شبنه كوني توشدن آلدين برپا ايتيليب، عالي محكمه ريسي عبدالسلام عظيمي عالي محكمه ويب صحيفه سيده جمهور رييس تمانيدن قويلگن عيبلاوني حجت سيز ديب ، اوني قتيق رد ايتگن.

عالي محكمه شونينگ ديك، قضايي باره سيده يوريتيلگن سوزلر آلدين دن ترتيبلنيشي كيره كليگي ني ايتيب، معلومات سيز روشده قويلگن عيبلاولرباره سيده افسوس بيلديرگن.

اشرف غني احمدزي نينگ بيرينچي سوز بياناتيده، صلح تامينلنيشي باره سيده توخته ليب، عدالت سيزليكده صلح تامين بولمسليگي ني ايتيب، عدالت گه ايريشيش اوچون عالي قضايي اداره لر اصلاح قيلينيشي كيره كليگي ني تاكيدله گن.

او افغانستان خلقيگه قضايي تيزيمده اصلاحات كيريتيش اوچون بار كوچ قوت ني ايشگه ساليشيني وعده بيرگن. او شونينگ بو مسله اوچون قضايي اداره ده صلاحيتلي كميته ايجاد ايتيشي ممكنليگي ني ايتگن.

افغانستان ينگي جمهور رييسي مملكت عالي محكمه سي بير آي ايچيده، مكافات و مجازات اصلي اساسيده برچه قضايي اداره لرني تيكشيريشي كيره كليگي ني تاكيدله گن.

عالي محكمه سوزچيسي عبدالله عطايي نينگ بي بي سي ايتيشيچه، بو اعلاميه عالي محكمه نينگ موقعي ني بيان ايته دي. اونگه كوره، فساد برچه اداره لرگه ايلديز آتگن، اما فقط بير گينه اداره فساد گه باتگن ديه آلمه يميز.

افغانستان عالي محكمه سي مملكت قضايي قوه سيني رهبرليك قيله دي. اساسي قانون گه كوره، قضايي قوه، افغانستان اسلامي جمهوري دولت مستقل ركني بوليب، اونينگ صلاحيتلري قانون ده قيد ايتيلگن.

افغانستان ينگي جمهور رييسي شونينگ ديك، عالي محكمه دن ايش شفافليگي، محكمه لرده گي قضيه لرني تيزليك بيلن حل قيليش و مكافات ـ مجازات معيارلري ني انيقلشتيريشيني سوره گن.

افغانستان قضايي اداره لري بوندن آلدين هم فساد ده عيبلنگندي و اولرگه قرشي قطار تنقيدلرچيققندي. اما ايلك بار ديركه بو اداره جمهور رييس نينگ سونگي اظهاراتي گه عكس العمل بيلديرماقده