پغمان حادثه سیده عیبلنگن بیش نفر ایرته گه اعدام ایتیلیشی ممکن

Image copyright bbc

کابل نینگ پغمان تومنیده جنسی تجاوزقیلگنلیکده عیبلنگن بیش نفر محکوم، ایرته گه اعدام ایتیلیشی ممکن. بوندن اون کون آلدین افغانستان سابق جمهور رییسی حامدکرزی بو بیش کیشی نینگ اعدام حکومی نی امضاله گن.

بو اون نفرلیک گروه دن ایکیته سی 20 ییل قماق جزاسی گه محکوم بولگن و باشقه اوچته سی هنوزگچه قولگه آلینمه گن. پولیس اولرنی قیدیره یاتگنینی ایتگن.

افغانستان حکومتی پغمان تومنیده اوغیرچیلیک و گروهی جنسی تجاوز ده عیبلنگن بیش کیشی نی گناهدار تنیب، ایرته گه اعدام قیلیشی ممکن.

اسمی سیزشقله نیشی نی ایسته گن افغانستان عالی محکمه سی بیر اعضاسی بی بی سیگه اولیمگه محکوم بولگن شخصلر ایرته گه اعدام ایتیلیشی ممکنلیگی دن خبر بیردی. اما بوحقده کوپراق تفصیلات بیرمه دی.

افغانستان ایچکی ایشلروزیرلیگی سوزچیسی صدیق صدیقی هم بوگون کابل ده اوتکزیلگن بیر مطبوعات انجمنیده پغمان حادثه سیده عیبلنگن بیش جنایتکار ایرته گه اعدام ایتیلیشی ممکنلیگی دن گپیردی:"پغمان قضیه سیده عیبلنگن شخصلر معلوماتیمیزگه قره گنده، ایرته اعدام ایتیلیشی ممکن. اما قه یرده و اعدام وقتی حقیده انیق معلومات قولده ایمس".

کابل پولیس قوماندانی جنرال ظاهر هم بو انجمن ده اعدام حکومی پلچرخی قماقخانه سیده اجرا ایتیلیشی احتمالی موجود دیدی.

اعدام حکمی عملی بولیشی ممکن بولگن بو بیش نفر بیر اون کیشی لیک گروه نینگ اعضاسی. اولر گناه کار تنیلیب، بوندن قریب بیر آی آلدین پغمان تومنی ده عربان قیشلاغیده بیر توی مراسمی مهمانلریدن بیرتعدادینی اوغیرلب، قیمت بهال اشیالرینی آلیب، تورته عیالگه گروهی شکلده تجاوز قیلگنلر.

کابل امنیه قوماندانی جنرال ظاهرگه کوره، افغانستانده جنایتچیلیک میزانی کمه ییشی اوچون، جمهور رییس اشرف غنی احمدزی باشقه جنایتکارلرنینگ اعدام حکومی نی صادر قیلیشی کیره ک:"باشقه بیرتعدادگه هم اعدام حکومی قوییلگن. هنوز اعدام قیلینمه گن. اولر هم اعدام بولیشی کیره ک.اگر اولر اعدام قیلینمسه پولیس و مردم نینگ جانی خطر تهدید قیله دی.اولر آزاد ایتیلگن حالده، ینه هم اوغیرچیلیک و قتل گه قول اوریشه دی. محکمه قرار قبول قیلگن حالده،آغیرجنایتچیلیککه عیبلنگن شخصلر تیزلیک بیلن اعدام ایتیلیشی کیره ک".

جنایتکارکار ایرته گه اعدام ایتیلرایکن، خلق ارا عفو تشکیلاتی افغانستان ینگی جمهور رییسی اشرف غنی احمدزیدن سابق جمهور رییس حامدکرزی طرفیدن امضالنگن بیش کیشی نینگ اعدام حکومی بیکار قیلیشی نی سوره گن.

بوندن آلدین بیرلشگن ملتلر تشکیلاتی نینگ انسان حقلری بوییچه عالی اداره سی هم افغانستان عالی محکمه سی نینگ پغمان قضیه سی ده عیبلنگن بیش نفرگه قویلگن حکوم نی امیدسیز دیب، اولرنینگ محکمه جریانی شفاف بولمه گنلیگی گه شبهه لنگندی.

افغانستان آلدینگی جمهور رییسی حامدکرزی اوزی نینگ سونگی فرصتلریده، آدم اوغیرلش وقتلده عیبلنگن بیرگروه جنایت کارلر باشلیغی حبیب استالیفی نینگ هم اعدام حکمی امضاله دی، اما اونینگ اعدامی قچان عملی بولیشی هلی معلوم ایمس.

معلوماتلرگه کوره، افغانستان محکمه لری اوتگن اون ییل ایچیده اوچ یوز دن آرتیق آدم نینگ اعدام حکمی صادر قیلگن، اما اون ییل جریانیده کرزی جنابلری فقط اون اوچ نفرنینگ اعدام حکومی امضاله دی.