افغانستان حکومتی ابولا ویروسیگه قرشی تدبیر آلماقده

افغانستان ساغلیق وزیرلیگی ابولا ویروس نینگ مملکت گه کیریب کیلیشینی آلدینی آلیش اوچون جدی چاره تدبیر لرنی یولگه قویگنینی معلوم قیلگن.

ساغلیق وزیرلیگی سوزچی سی کنشکا ترکستان نینگ معلوم قیلیشیچه طبیات خادم لری افغانستان گه کیریب کیله یاتگن شخص لرنی نظارت ایتیش اوچون هوا قونلاغه لریده وظیفه لنتیرلگن.

اونگه کوره طبیات خادملری شبهه لی شخص لرنی انیق لب، ویروس نینگ ترقه لیشی آلدینی آلیش اوچون اولرگه طبی توصیه لر قیلنه دی .

ساغلیق وزیرلیگی جهان ساغلیقنی سقلش تشکیلاتی نینگ ابولا ویروس نینگ افغانستان گه کیریب کیلیشی خصوصیده آگاه لنتیریشی آرتیدن بو کبی چاره تدبیر لرنی آلماقده.

Image copyright SPL
Image caption ابولا ویروسی

ترکستان جناب لری نینگ ایتیشیچه کسلیک بیلگی لرینی کورسته یاتگن شبهه لی شخص لر کابل ده کی ایککی طبی مرکز ده قرنطین ایتله دی .

حج مراسمی نینگ توگه شی بیلن افغان حاجی لرنینگ مملکت گه قیتیب کیلیشلری ابولا ویروس نینگ ترقه لیب کیتیشی خصوصده کی خواطر لرنی پیدا قیلگن .

کیله سی ۲۵کونده ۲۴ مینگ نفر حج زیارتی دن قیتیشی کوتلماقده.

افغانستان نینگ حج وزیرلیگی معاون دای الحق عابد نینگ معلوم قیلیشیچه حج زیارتی جریانیده ۷ کیشی ایرکک و ۵ عیال کسلیک و کیکسه لیگی طفیلی حیاتدن کوز یومگن. بیراق حاضرگچه بیران کیشی نینگ هم ابولا ویروسیگه چلینگنی خصوصیده خبر ترقلمه گن .

حاضرگچه جهان بویلب ۳۴۰۰ کیشی ابولا کسلیگی طفیلی حیاتدن کوز یومگن. هلاک بولگن لرنینگ اکثریتی غربی آفریقا ده کی سیرالئون، لیبریا، گینه و نیجریه مملکت لریدن بولگن .