افغانستان آرقه لی پاکستان گه برقنی اوتکزیش بیتمی امضا لندی

تاجیکستان و قیرقیزستان دن افغانستان ارقه لی برق اوتکزیش بیتمی امضالنگن، بو ریجه عملی بولگنده بیرمینگ میگاوات برق افغانستان ارقه لی پاکستانگه اوتکزیله دی. همده اوچ یوزمیگاوات برق هم افغانستانگه بیریلیشی گه کیلیشیلگن. افغانستان سووبرق وزیرلیگی بو ریجه ایشگه توشیریلیشی بیلن هرییلی افغانستان قریب التمیش میلیون دالر عاید قولگه کیرتیشینی ایتگن. برق سیملری اوچ یا تورت ییلده تارتیلیشی ریجه لنگن افغانستان حکومتی نینگ ایتیشیچه، قرقیزستان وتاجیکستان دن 1300 میگاوات برق آلیب کیلنیشگه کیلیشیلگن بوندن اوچ یوز میگاواتی افغانستان اوچون باشقه قالگن بیرمینگ میگاواتی افغانستان توپراغی ارقه لی پاکستانگه انتقال بیریلیشگه قرار قبول قیلینگن. ترانزیت پولی خصوصیده گی قرشیلیک لر بو پروزه نینگ کیچیکتریلیشگه اصلی عامل دیب کورسه تیلگن. افغانستان مالیه وزیرلیگی سوزچیسی عبدالقادر جیلانی، افغانستان و پاکستان مالیه وزیرلری اره سیده بو پروژه نینگ عملی قیلیش بیتیمی اوتگن کون واشنگتن ده امضابولگنینی ایتدی:"کاسا قرارداد پروژه سی افغانستان و پاکستان اره سیده امضالندی بوقرارداد اساسیده ترانزیت فیسی حقیده هم کیلیشیلگن، خدا خواه لسه بو پروژه نینگ باشقه ایشلری هم نیچه آی جریانیده قول اوستیگه آلینه دی. یقین زمانده عملی ایشی باشله نیشگه امیدوار میز ." امضالنگن کیلشوو اساسیده پاکستان تامانی هربیرکیلوات برق اوچون 1.25 سنت افغانستان دولتیگه بیره دی. افغانستان سووبرق وزیرلیگی نینگ اورین باسری غلام قادر قاضیزاده بی بی سی بیلن بولگن صحبتیده، بوندن الدین پاکستان هرکیلوات برق اوچون 2.5 سنت بیریشی تکیلیف قیلینگنینی ایتدی. اونگه کوره شو اساسده افغانستان هرییلی آلتمیش میلیون دالر درامد قولگه کیریترایکن:"آلدینکی کیلشوو اساسیده بو قرارداد امضالنگن حالده افغانستان هرییلی بو ارقه لی قریب التمیش میلیون دالر درامد قولگه کیریترایدی." بو مقام نینگ ایتیشچه ینگی کیلشوو اساسیده برق سیملرینی تارتیش پروژه سی کیله جک آییده باشله نیشی ممکن. مذکور پروژه اوچ یا تورت ییلگه قدر بیتکزیلیشی کوزلنگن. تاجیکیستان و قرقیزستان دن برق سیم لرینی افغانستان ارقه لی پاکستان گه تارتیش ریجه سی میلادی 2008 ییلده پاکستانده مباحثه ایتیلگن ایکن. سووبرق وزیرلیگی اورین باسری غلام قادر قاضیزاده نهای بیتم تاجیکستان، قیرقیزستان، پاکستان وافغانستان وکیللری اره سیده امضانیشی نی تیلگه آلدی. سووبرق وزیزلیگی مقاملری نینگ ایتیشلریچه، برق سیملری تارتیلیشی و برق پایه لرینی قوریش اوچون افغانستان 363 میلیون دالر توله شی کیره ک جهان بانکی بومبلغ نینگ بیریشینی سوزبیرگن. ییگیرمه بیش میلیون دالری پروژه امنیتینی تامینلش اوچون اجره تیلگن.برق سیم لری شیرخان بندردن سالنگ ارقه لی کابل نینگ ده سبز منطقه سیگه تارتیلیب بو ییردن تورخم ارقه لی پاکستانگه تارتیلیشی ریجه لنگن.