فسادگه عیبلنگن بیش سابق وزیر دوسیه لری محکمه گه یوباریلدی

افغانستان باش قاره لاوچیلیک اداره سی، حامدکرزی کابینه سیده وزیر صفتیده وظیفه بجرگن بیش سابق وزیر دوسیه لرینی قیته تیکشیریش اوچون عالی محکمه گه یوبارگنینی ایتگن.بو سابق بیش وزیر دولتی مقاملریدن سوی استعمال قیلیش وپاره خوررلیککه عیبلنگن.

قاره لاوچیلیک سوزچیسی عزیز بصیر اوتگن کون مطبوعات انجمنی اوتکزیب عیبلنگن سابق بیش وزیر اسم لرینی اعلام قیلدی.

افغانستان سابق تجارت وزیری محمد امین فرهنگ، ترانسپورت وزیرلیگی نینگ سابق وزیرلری عنایت الله قاسمی و حمید الله قادری. کانلر وزیرلیگی نینگ سابق وزیری صدیق ایشان و اقتصاد وزیرلیگی نینگ سابق وزیری جلیل شمس لر ماموریت لری دوریده فسادگه قولی بارلیککه عیبلنیب دوسیه لری عالی محکمه گه یوباریلگن.

شونینگ دیک قاره لاوچیلیک اداره سی سوزچیسی باشقه سابق وزیرلر خصوصیده هم عیبلاو لر موجودلیگینی اورغولب، دوسیه لری تکمیل ایتیلیشی بیلن عالی محکمه گه یوباریلیشی ممکن لیگینی ایتدی.

عزیز جنابلریگه کوره، اساسی قانون گه ماس سابق وزیرلر دوسیه لری تیکشیریلیشی اوچون مخصوص محکمه تشکیل ایتیلیشی طلب قیلینگن.

تورت ییل آلدین هم قاره لاوچیلیک اداره سی ایریم مقاملرنی فسادگه قولی بارلیککه عیبلگنینی ایتگن ایدی، بو کبی دوسیه لرنی تیکشیریش اوچون هیچ قندی محکمه ایجاد ایتیلمه دی.

افغانستان تجارت وزیرلیگی نینگ سابق وزیری محمد امین فرهنگ تورت ییل آلدین هم شوندی عیبلاو اونگه قوییلگنینی ایتیب اما جواب بیریش اوچون مخصوص محکمه تشکیل ایتیلمه گنینی تیلگه آلدی. شونینگ دیک او، محکمه تشکیل ایتیلگن تقدیرده جواب بیریشگه تیار ایکن لیگینی تاکیدله دی.

کانلر وزیرلیگی نینگ سابق وزیری محمد صدیق ایشان عیبلاونی رد ایتیب، اونینگ ماموریت پیتی هیچ قندی قرار داد امضالنمه گنینی اورغوله دی.

تورت ییل آلدین ییگرمه دن ارتیق دولت مقاملری فسادگه قولی بارلیککه عیبلنگنی قاره لاوچیلیک اداره سی تامانیدن اعلان قیلینگن ایدی. اما حاضر اعلان ایتیلگن روی خط ده اولر اسملر کوریلمیدی. قاره لاوچیلیک اداره سی هم بوباره ده اچیق معلومات بیرمیدی.