قندوز ولایتی نینگ قاره لاوچیلیک اداره سیگه اویوشتیریلگن هجوم یکون تاپدی

Image copyright

قندوز ولایتی نینگ پلیس اداره سی سوزچیسی سید سرور حسینی بی بی سی بیلن بولگن صحبتیده قاره لاوچیلیک اداره سیگه اویشتیریلگن گروهی هجوم یکون تاپگنینی ایتدی. اونینگ ایتیشچه قاره لاوچیلیک بناسی یانیب کیتگن وجسدلر چیقاریلماقده.

حسینی جنابلری انیق قنچه کیشی قربان بولگنی باره سیده هیچ نرسه ایتمه دی، قربان لر اره سیده بیرنیچه قاره لاوچی هم بارلیگینی تیلگه آلدی.

بوندن الدین قندوز پلیس اداره سی هجومچیلر تورت کیشی بولیب بیری اوزینی پارتله تیب باشقه بیری هم پلیس تمانیدن اولدیریلگنینی ایتگن ایدی. شونینگدیک باشقه ایککی انتحارچی نیچه ساعت پلیس بیلن اوروشگن.

قاره لاوچیلیک اداره سیدن یوزمترلیک اوزاق لیکده جایلشگن استاد غازی خان لیسه سی نینگ استاد لریدن فریدون محمدی، پلیس موترلری و امبولانس لرارقه لی هلاک ویره لنگن لر انتقال بیریله یاتگنیگه شاهد بولگنینی ایتدی.

شمال شرقی قندوز ولایتیده قوراللی عصیانچیلر انچه فعال بولیب، اوتمیشلرده، قندوز شهری دروازه لریگه قدر هم اوز فعالیت لرینی کینگیتیرگنی ایتیلگن ایدی.

عینی حالده بو ولایت نینگ امام صاحب، دشت ارچی و چهادره کبی تومنلری طالبان نینگ فعالیت مرکزیگه ایلنگنی خصوصیده هم خواطرلر بیلدیریلگن ایدی.