قندوزده گی گروهی هجومده آلتی قاره لاوچی و بیر پلیس هلاک بولگن

Image copyright

قندوزولایتی نینگ قاره لاوچیلیک اداره سیگه اویوشتیریلگن گروهی هجومده ییتتی کیشی قربان بولگن، هلاک ایتیلگنلردن التی ته سی قاره لاوچی خادملری و بیری هم پلیس عسکری . توقنه شوولرده سککیز قاره لاوچی داخل اون نفر یره لنگن.

ملی اردو کییمیده بولگن انتحارچیلردن بیری بیرینچیدن قاره لاوچیلیک اداره سی مقابلیده اوزینی پارتله تیب باشقه قالگن اوچ انتحارچی اداره ایچکریسیگه باستیریب کیریشگه موفق بوله دی. هجومچیلر و پلیس کوچلری آره سیده اوروش محلی وقت بیلن اون ایککی ده باشله نیب توشدن کیین اوچ یریمگه قدر دوام تارتدی. قندوز ولایتی نینگ پلیس اداره سی نینگ سوزچیسی سید سرور حسینی بی بی سی بیلن بولگن صحبتیده قاره لاوچیلیک بناسی یانیب کیتگنینی اورغولب هجوم تلفاتی باره سیده شوندی معلومات بیردی:"بوگروهی هجومده یتتی نفر شهید بولدی، بیری پلیس و یتتی ته سی قاره لاوچی ایشچیلری، اون نفر یره لنگن، یتتی ته سی قاره لاوچی، بیری عسکر و باشقه بیری هم اوشبو اداره ده آشپزلیک قیله یاتگن بیرعیال. قاره لاوچیلیک باتشلیغی توقنه شوولرجریانیده پلیس تمانیدن محلدن چیقاریلگن ایدی."

یره لنگن شخصلر قندوز ولایتی نینگ مرکزی کسلخانه سیگه انتقال بیریلگن، وضعیت لری یخشی ایکنی ایتلماقده.

طالبان قوراللی لری هجوم مسوولیتی نی اوز ذمه سیگه آلیب مذکور گروهی هجومده قاره لاوچیلیک خادملری هلاک بولگنینی ادعا قیلگن. همده بوگروه سوزچیسی تمانیدن ترقه تیلگن بیاناتده، توتقینگه آلینگن طالبان گه قاره لاوچیلیک اداره سی تمانیدن قتیق جزالر چیقه ریلیشگه قرشی بو هجوم اویوشتیریلگنینی ایتگن.

شمال شرقی قندوز ولایتیده قوراللی عصیانچیلر انچه فعال بولیب، اوتمیشلرده، قندوز شهری دروازه لریگه قدر هم اوز فعالیت لرینی کینگیتیرگنی ایتیلگن ایدی.