"فرزندلریم بیلن بیرگه اوزیمنی یاقیب یوباره من"

بوندن بیش ییل اول بدخشان ولایتی ده گروهی شکلده جنسی زورلنگن بیر عیال نینگ جنایی دوسیه سی قیته کوریب چیقلیشگه بویروق بیرلگن .

افغانستان جمهور رئیسی محمداشرف غنی بوگون جبرلنگن بوعیال نینگ تورموش اورتاغی بیلن تیلفونی صحبت اوتکزیب عدالت نینگ تامین لنیشیگه وعده بیرگن .

زیبا ناملی عیال شهر بزرگ تومنیده 8 کیشی تمانیدن زورلنگندی.

" کیچه ساعت 12 اطرافی ده باشیمنی یاستیققه قویه یاتگن پیتده درواز اوریلدی. مین کیم دیب سوره دیم. آوازچیقمه دی. مین دروازه آرقه سیده کی شخص لر تورموش اورتاغیمنی اولدریش اوچون کیلگن لیگنی حس قیلیب ایشیکنی آچمه دیم.لیکن اولر ایشیک نی سوریب سیندیریب ایچکرگه کیردی لر. مین قوراللی لرنی کوریب ییغله باشله دیم ،ابه جان ینگی باله دنیا کیلترگنمن دیب، اما بو حالمگه قره مسدن مینی کلتکله دیلر. اولربیلن زوریم باریچه تلشدیم. اوچ تیشیم هم سینیب توشدی لیکن اوندن کیین نیمه بولگنی نی بیلمه یمن،" دیب ایته دی زیبا.

زیبا نینگ تورموش اورتاغی حادثه روی بیرگن کیچه سی اویده بولمه گن. جنسی زورلنگن بو عیال حادثه روی بیر گن کونی نینگ یرته سیده اوزجانیگه قصد قیلیشنی ایتگن.

حادثه دن خبر تاپگن زیبا خانم نینگ تورموش اورتاغی عایله سینی سقلش اوچون قندوز ولایتیگه کوچیشگه مجبور بولگن.

اونینگ حاضر5 ته فرزندی بار.

"مین بوحیاتدن تیرمن، بوندن کوره اولگنیم یخشی. قوم قرینداش وقوشنی لرنی کوره آلمی اویاتلنه من" دییدی خانم زیبا روی بیرگن حادثه آرتدن.

جنسی زورلنگن خانم زیبا نینگ ایری جهانگیرنینگ ایتیشیچه حادثه گه مسوول بولگن شخص لر بدخشان پلیس کوچلری تمانیدن بیرمرته قولگه آلینگن بیراق محلی ده کی قورالی قوماندان لردن بیری واسطه سی بیلن قولگه آلینگنلردن بیش نفری قویب یوبارلگن.

اولردن بیرنیچیته سی قوشنی مملکت لر وبیرنیچیته سی هم مملکت ایچکریسیده حیات کیچره یاتگن ایتله دی .

زیبا خانم نینگ تورموشی اورتاغی جنسی زورلش حادثه سیده قول بولگن شخص لرنی محاکمه گه تارتیش اوچون انچه دن بویان سعی حرکت قیلیب کیلماقده . او عینی مساله یوزه سیدن نیچه بار اولوم تهدیدگه هم دوچ کیلشگن .

یقینده بوعیال اوزتورموش اورتاغی بیلن جنایتچی لرننینگ محاکمه گه تارتیلیشی اوچون کابل گه کیلگنلر.

جبرلنگن عیال ایری جهانگیر اگر دولت بومساله گه جدی اعتبار قره تیب وجنایت گه قول اورگن لرنی جزالشمسه، اوزعایله اعضاسی بیلن اوزینی یاقیب یوباریشینی ایته دی.

"ظالم لرقولیدن عریضه بیرگنی کیلدیم. اگرعرضیم سوره لمه سه چهار راهه ده برچه فرزندلریم بیلن اوزیمنی یاقیب یوباره من. حکومت بیزلرنی مظلوم لیگمیزاوچون حمایه قیلیشی کیره ک،" دیدی جهانگیر

بوگون افغانستان جمهور رئیسی محمداشرف غنی بو قضیه دن خبرتاپیب جهانگیربی بی سی خبرنگارلری بیلن صحبت بیره یاتگن پیتده اوبیلن تیلفونی صحبت قیلگن.

غنی جنابلری بو واقعه نی جدی تیکشیریب عدالت نینگ تامین له نیشی باره سیده سوزبیرگن.

شونینگ ایچکی ایشلروزیری هم جبرلنگن بوعیال تورموش اورتاغی جهانگیزنی وزیرلیککه چقیریب جنایتچی لرنی جزاگه تارتیشی باره سیده سوزبیرگن.

بوحادثه بوندن 5ییل آلدین بدخشان ولایتی نینگ شهربزرگ تومنیده یوزبیرگن.

بیربدخشان واقعه سی ایمس بلکی شونگه اوخش زورلش واقعه لری مملکت بویلب یوزبیریب کیلماقده.

بوندن بیرنیچه آی آلدین کابل نینگ پغمان تومنی دن کابل شهریگه کیله یاتگن بیرنیچه عیال قوراللی لرتامانیدن گروهی زورلب وپول وتقینچاقلرینی آلگن ایدی. حادثه دن کیین مذکور واقعه عامللری قولگه آلینیب کیین اولردن 5ته سی اعدام جزاسیگه حکم ایتیلدی.