ناتو نینگ افغانستانده گی حربی ماموریتی ایکی آیده یکون تاپه دی

افغانستان گه سفر قیلگن ناتو باش کاتبی وینس استولتنبرگ ناتو نینگ افغانستانده گی حربی ماموریتی ایککی آیدن کمراق زمانده یکون تاپیشینی ایتدی، اما افغان امنیتی کوچلری نینگ مشق و تیارگرلیک لردن اوتکزیش برنامه سی دوام ایتیشی نی معلوم قیلدی.

جمهوررییس بیلن قوشمه مطبوعات انجمنی اوتکزگن ناتو باش کاتبی کیله جک ییل ینگی فصل باشله نیشینی اورغولب افغانستان کیله جگی افغانلر اختیاریده بولیشی ممکن لیگینی ایتدی.

همده او، افغان امنیتی کوچلری افغانستان بویلب امنیت نی تامین لشگه قادر ایکن لیگیگه ایشانچ بیلدیردی.

ناتونینگ افغانستانده گی حربی ماموریتی میلادی 1014 ییل آخریگه یکون تاپه دی.

اوتکزیلگن قوشمه مطبوعات انجمنیده جمهورییس محمد اشرف غنی اوتگن اوچ ییل جریانیده خوف سیزلیک مسوولیت لرینی افغان کوچلریگه تاپشیریش جریانی بیش باسقیچ ده عملی بولگنینی تیلگه آلدی. اونگه کوره، شو بیلن افغان امنیتی کوچلری خوف سیزلیک مسوولیتلرینی اوز ذمه سیگه آلگنلر.

غنی جنابلری نینگ ایتیشیچه:" دسامبر آی نینگ 31- سیدن سونگ افغانستانده فقط افغان امنیتی کوچلری قورال دن فایده لنیشی ممکن."

اما او، بومساله ناتو همکارلیگی توختب قالیش معنی سیده ایمس لیگینی اورغولب ناتو همکارلیگی نینگ ینگی باسقیچی باشله نیشی ممکن لیگینی ایتدی.

جمهوررییس غنی امنیتی کوچلر خرجتی حاضرگه قدرهم چیت ایللیک یاردم لر گه باغلیق ایکنلیگیدن تاسف بیلدیریب ، افغانستان اقتصادی کوچله نیشی بیلن امنیتی کوچلر بودجه سی ایچکی منبع لردن تامین له نیشی ممکن لیگیگه ایشانچ بیلدیردی.

غنی جنابلری حاضرگی شرایطده کوپ قینچلیک لر موجودلیگینی ایتیب، ملی بیردملیک حکومتی نه فقط امنیت بلکه اقتصادی اوسیش و صلح نی آلیب کیلیشگه تعهدلی ایکنینی بیلدیردی.

ملی بیردملیک حکومتی، ایشی نینگ ایککینچی کونیده ناتو بیلن امنیتی پیمان امضاله دی.

امنیتی پیمان افغانستان ملی امنیت مصلحت چیسی حنیف اتمر وناتو نینگ مخصوص ملکی وکیلی موریس یوخمس تامانیدن امضالنگن ایدی.

بو کیلیشوو بیتم اساسیده میلادی 2014 ییلدن سونگ هم ایریم ناتو کوچلری افغانستانده قالیب فعالیت لری افغان امنیتی کوچلری نینگ مشق و تیارگرلیک لردن اوتکزیش خصوصیده قره تیله دی.