افغانستانده یوزبیرگن نیچه پارتلشده کمیده 9 پلیس هلاک بولدی

جنوب شرقی لوگر ولایتیده یوزبیرگن انتحاری هجومده آلتی پلیس و بیر تینچ فقرا هلاک بولگن. لوگر ولایت حاکمی سوزچیسی دین محمد درویش نینگ بی بی سی گه ایتیشیچه، پلیس کیمیده بولگن انتحارچی شخص محلی پلیس عسکرلری آره سیده اوزینی پارتلتگن.

لوگر حاکمی سوزچیسی گوره، بوهجومده محلی پلیس قوماندانی سبزعلی هم هلاک بولگن.

شونینگ دیک تورت محلی پلیس عسکری مذکور حادثه ده یره لنگنی تصدیق لنگن. طالبان گروهی حادثه مسوولیتی نی اوز ذمه سیگه آلگن.

ننگرهار:

افغانستان شرقیده جایلشگن ننگرهار ولایتیده یوزبیرگن پارتلشده اوچ پلیس هلاک وباشقه بیر پلیس یره لنگن.

ننگرهار ولایت حاکمی سوزچیسی احمدضیا عبدالزی بی بی سی بیلن بولگن صحبتیده پارتلاوچی ماده موترسایکل گه جایلشتیریلیب پلیس موتری اوته یاتگن بیر پیت پارتله تیلگنینی ایتدی.

عبدالزی جنابلری نینگ ایتیشیچه، پارتلش محلی وقت بیلن ساعت یتتی یریم اطرافیده جلال آباد شهری نینگ آلتی کیلومترلیگیده یوزبیرگن.

محلی مقاملرگه کوره، هلاک بولگنلر ننگرهار ولایتی نینگ پلیس اکادمی سی نینگ اعضاسی بولگن. یره لنگن لر ایسه کسلخانه گه آلیب باریلگن.

طالبان حادثه مسوولیتی نی اوز ذمه سیگه آلیب کادمی استاد لری بو حادثه ده هلاک بولگنینی ادعا قیلگن.

کابل:

بگون ایرته لب پایتخت کابلده هم پارتلش روی بیریب نتیجه ده اوچ تینچ فقرا یره لندی.

افغانستان ایچکی ایشلر وزیرلیگی سوزچیسی صدیق صدیقی تویتر صحیفه سیده مذکور پارتلش کابل شهری ننگ تورتینچی محلله سیده روبیرگنینی معلوم قیلگن.

معلومات لرگه کوره، پارتلاوچی ماده بیر درخت گه جایلشتیریلگن ایکن. کابل پلیس اکادمیسی و تعلیم و تربیه بیلیم یورتی پارتلش روی بیرگن محل یقینیده جایلشگن.

بوهجوم مسوولیتی نی حاضرگه قدرهم هیچ بیرگروه اوز ذمه سیگه آلمه گن.

اوتگن کون کابل پلیس اداره سی باشلیغی نینگ ایشخانه سیده انتحارچی شخص اوزینی پارتلتدی،نتیجه ده کابل پلیسی نینگ دفتر مدیری هلاک و التی کیشی یره لندی. همده کابل نینگ " کارته نو" محلله سیده هم پارتلش صادر ایتیلگن ایدی.