ننگرهار ولایتیده ایکی انتحاری هجوم یوزبیردی

مقاملرگه کوره، بیرینچی انتحاری هجوم جلال آباد شهری نینگ " رینک رود" ناملی محلله سی و ایککینچی هجوم هم ننگرهار ولایتی نینگ بهسود تومنیده یوزبیرگن. ایککی هجومده هم خارجی کوچلر کاروانی نشانگه آلینگن.

بیرینچی انتحاری هجوم محلی وقت بیلن ساعت توقیز اطرافیده " رینگ رود" ناملی محلده یوزبیرگن.رسمیلرگه کوره، بو پارتلشده خارجی حربیلرگه تیگیشلی بیر موتر ویران ایتیلگن.

افغانستانده فعالیت آلیب باره یاتگن چیت ایللیک لر حاضرگه قدر بوخصوصده هیچ نرسه دیمه گن، اما طالبان هجوم مسوولیتی نی اوز ذمه سیگه آلیب خارجی کوچلر آغیر تلفات کورگنینی ادعا قیلگن.

عینی حالده بوگون توش یقینلشگن بیر پیت ننگرهار ولایتی نینگ بهسود تومنیده هم انتحاری هجوم روی بیرگن. بو هجومده هم خارجی کوچلر کاروانی نشانگه آلینگن.

ننگرهار حاکمی سوزچیسی عبدالزی جنابلری نینگ ایتیشیچه ، ایکینچی انتحاری هجومده بیر تینچ فقرا هلاک و بیر تینچ فقرا هم یره لنگن. اونگه کوره، خارجیلرضرر کورمه گن.

بوندن اوچ کون مقدم هم جلال اباد شهریده پارتلش یوزبیریب نتیجه ده اوچ پلیس هلاک ایتیلگن ایدی.

افغانستان حکومتی عصیانچیلرنی یوق ایتیش اوچون بیرنیچه حربی عملیات لرنی هم یولگه قوییدی اما شوندی بولسه هم طالبان عصیانچیلری بولایت نینگ ایریم حدودلریده انچه فعال بولگن.

نیچه کون الدین ننگرهار ولایتی نینگ ده بالا تومنیده طالبان تهدید باعث اوتیزگه یقین مکتب یاپیلگنی خبرقیلینگن ایدی.