سنامجلسی امریکا و ناتو بیلن امضالنگن امنیتی همکارلیک بیتیملرینی تصدیق له دی

Image copyright parliament.af

افغانستان سنامجلسی بکونگی اوتکزگن فوق العاده یغینیده افغانستان امریکا و ناتو اره سیده امضالنگن امنیتی همکارلیک بیتملرینی بحث گه آلیب اکثریت آواز بیلن تصدیق له دی. بو ایککی بیتم نیچه کون آلدین اولوسی جرگه تامانیدن تصدیق لنگن ایدی.

سنامجلیسی نینگ بوکونگی یغینده حضور تاپگن 72 سناتور دن فقط یتتی نفری مخالف آواز بیرگنلر. بو ایککی همکارلیک پیمانی بوندن الدین اولوسی جرگه تامانیدن تصدیق له نیب سنا مجلیسی گه یوباریلگن ایدی.

افغانستان وامریکا اره سیده امضالنگن بو حجت اساسیده امریکالیک کوچلر افغانستان نینگ تورلی منطقه لری کابل، بگرام، مزارشریف، هرات، قندهار، هلمند، گردیز، جلال آباد و شیندند ده حربی قرارگاه قوریشگه رخصت تاپه دی.

شونینگدیک بو کوچلر افغانستان نینگ یتتی استراتیژیک هوا قونالغاسی همده تورخم ، اسپین بولدک، تورغندی، حیرتان و شیرخان بندگاه لریدن کیریب چیقیشلری اوچون فایده لنه آله دیلر.

بو کیلیشوو بیتم نینگ میلادی 2024- ییلگه قدر اعتباری بولیب ایککی مملکت کیلیشوو اساسیده اوزیتیریلیشی ممکن.

بو ایککی حجت اساسیده ناتو و امریکا لیک کوچلرنینگ افغانستانده گی حربی ماموریتی جاری میلادی ییل اخریده یکون تاپیب افغان امنیتی کوچلری نینگ مشق و تیارگرلیک لردن اوتکزیش بولیم لریگه قره تیله دی.