افغانستانليك بروس لي قنچه ليك مشهور؟

Image caption بو ييگيت نينگ اسمي عباس، او كنگ فو هوسكاري.

هاليوود فيلمي نينگ مشهوراكتوري بروس لي نينگ اوليميدن ييللر اوتدي. اما هنوز اونينگ مخلصلري دنيا بويلب آز ايمس. افغانستان پايتختي كابلده بروس لي گه اوخشه گن بير ييگيت، افغانستان بروس لي سي صفتيده مشهور بولگن. بو ييگيت نينگ اسمي عباس.

او كنگ فو هوسكاري.

بو، ييللر آلدين حيات دن كوز يومگن بروس لي ايمس، بو 21 يشر عباس علي زاده افغانستان نينگ بروس لي سي.

او كابل شهري نينگ بير چيكه منطقه سيده حيات كيچيره دي. آته سي شل و آنه سي نينگ يگانه اميدي انه شو اوغلي.

او شو يقين وقتلرگچه عاديگينه آدم ايدي، اما اجتماعي ترماغلر واسطه سي بيلن حاضر مشهور بولگن. بوگونگي كونده اجتماعي ترماغلرگه اونينگ بروس لي قيافه سي بيلن چيققن فوتوصورتلري كينگ ترقلماقده.

Image caption بو، ييللر آلدين حيات دن كوز يومگن بروس لي ايمس، بو 21 يشر عباس علي زاده افغانستان نينگ بروس لي سي.

فسبوك صحيفه سي پياملر و دوستليك تكليفلريدن توله.

عباس اوزي نينگ فسبوك صحيفه سي باره سيده گپيره دي:"كومنت يازه ديگنلردن اكثريتيني امريكاليك دوستلريم تشكيل بيره دي. اولر ميني امريكا هاليوود سينماسيده قتنه شيب، بروس لي اورنيني ايگللشيمگه چقيره يپتي".

ميه چيقه ليشي عاقبتيده تنه سي نينگ يريم قسمي شل بولگن علي نينگ آته سي محمد رضا، اوغلي نينگ زمانوي بروس لي بوليشيگه دعا قيله دي:"اوغليم 13 ـ 14 ياشيده باشله دي.

كملغل ايديك و رسمي جايگه اورگه نيشگه قويه آلمه ديك، اويده اورگندي. قوروق قول بيلن باشلب، 21 ياشگه ييتدي. هنوزهم دوام ايتديرماقده.

بروس لي اورينيني آليشيني الله دن سوره ي من".

او بوندن بيش ييل مقدم كابلده گي كوره ش صنعتلريني اورگه تيش سپورت كلپيلريدن بيريگه كيريب، اووشو ني مشق قيله باشله دي. اما كمبغلليك اونگه مجال بيرمه دي.

حاضر ايسه فقط كلپلردن بيريده مشق قيله دي. كلپ مسووللري عباس ني بي پول مشق بيريشه دي.

Image caption كلپ مسووللري عباس ني بي پول مشق بيريشه دي.

عباس، بروس لي گه اوخشه گني و سينماگه يول تاپيش اميدي بيلن، ييللر زيرخانه لرده مشق قيلگن:"جماعه ده بروس لي گه بير نمونه صفتيده قره شه دي.

هم سپورت نظريدن هم كريكترنظريدن. بروس لي تكرار بولمه ي ديگن بير قهرمان دير. بروس لي بوله آلمسليگيم ممكن، حياتيمده اونينگ يوليني دوام ايتديره من".

Image caption علي نينگ آته سي محمد رضا، اوغلي نينگ زمانوي بروس لي بوليشيگه دعا قيله دي:"اوغليم 13 ـ 14 ياشيده باشله دي.

بروس لي عباس نينگ باله ليك قهرماني ايدي. او پيتلرده فقط گينه دولت تلويزيوني فعال ايدي. بروس لي وجكي چن فليملريگه مخلصلر افغانلر آره سيده كوپ ايدي.

حاضرگي نسل بروس لي ني كوپ تنيشمسه هم، عباس بروس لي نينگ شكل و شمايلي و مخصوص حركتلريني خياللرده قيته دن زنده قيلماقچي.