بلخ ولایتیده توی مراسمی نشانگه آلیندی

شمالی بلخ ولایتی چمتال تومنیده کونی کیچه ساعت 12 اطرافیده قوراللی طالبان بیر توی مراسمینی قول بمبه بیلن نشانگه آلیب، نتیجه ده اشتراکچیلردن 3 کیشی اولیب باشقه 13 نفری یره لنگن.

بلخ امنیه قوماندانلیگی سوزچیسی شیرجان درانی نینگ بی بی سیگه حادثه نی تصدیقلب ایتیشیچه، اولیب یره لنگنلرنینگ برچه سی توی اشتراکچیلری بولگن.

اونگه کوره،هجوم کیملر تمانیدن عملگه آشیریلگنی، هنوزگچه معلوم ایمس، مسله یوزه سیدن موضوع نی یقیندن انیقلشتیریش اوچون، محلگه هییت جونه تیلگن.

او شونینگدیک، حادثه شخصی یاهم توی جنجللریدن کیلیب، چیققنی احتمالی موجودلیگی نی تاکیدله دی.

اما بلخ امنیه قوماندانلیگی خوفسیزلیک آمری عبدالرزاق قادری، توی اشتراکچیلری خرسندچیلیک بیلدیریش مقصدیده، هواگه قره ته اوق اوزه یاتگن بیرچاغده، قوراللی طالبان فرصت دن فایده لنیب، خرسندچیلیکلرینی برهم اوریش مقصدیده، بمب بیلن هجوم قیلگن دییدی.

اونینگ معلوم قیلیشیچه، مذکور حادثه ده کیلین ـ کیاوگه ضرر ییتمه گن. اما اولرنینگ بیرقطار عایله اعضالری اولیب یره لنگن.

چمتال بلخ ولایتی نینگ نسبتآ ناتینچ تومنی حسابلنه دی. بو تومن نینگ ایریم قیشلاقلریده قوراللی مخالفلر فعالیت قیلیب، گاهیده خوفسیزلیک کوچلری بیلن توقنه شیب توریشه دی.