میمنه لیک عیاللرنیگه برقع كييب سپورت قيليشماقده؟

Image caption ميمنه لیک عياللر نامحرم شخصلر اولرني كورمسليگي اوچون، برقع بيلن سپورت قيليشگه مجبورلر

شمالی فاریاب ولایتی مرکزی میمنه شهریده فقطگينه بیر ته دم آلیش پارک موجود. اما بو پارك نينگ بير چيككه سي عياللر اوچون سپورت ميداني صفتيده اجره تيليب، اونينگ تورت تماني بلند ديواربيلن قمره لنگن.

اما شونگه قره مسدن، ميمنه لیک عياللر نامحرم شخصلر اولرني كورمسليگي اوچون، برقع بيلن سپورت قيليشگه مجبورلر. سپورت گه قيزيقه ياتگن بو عياللرنينگ ياشي 30 دن يوقاري بوليب، اکثر يتي قند، قان باسیمی و سیمیزلیک کسلیک خسته ليگي دن اوزلريني قوتقه زيش اوچون سپورت قيليشگه مجبور .

اما عياللرنينگ برقع كييب سپورت قيليشلريگه قره مه ي، ايرككلرنينگ اولرگه بيزاوته قيله ياتگنليكلريدن شكايت ده:"بیز بو ییرگه دردیمیزنی دوالش اوچون کیله میز، لیکن قره نگ انه اویانده گی ایرککلر بیز اویيمیزگه قیتگونچه، بیزدن کوز اوزمیدیلر. بیز یازیلیب چاپه آلمه يميز، انه شونده ی مشکللر بار" دیيدی سپورت قيله ياتگنلردن بيري مریم اسملي عيال. بو پارك ده عياللر اوچون اجره تيلگني باعث، اونينگ خوفسيزليگي هم عياللر تمانيدن تامينلنه دي. پارك ايشيگي آلديده قوريقچيسي صفتيده خذمت قيله ياتگن عياللردن بيري ايرككلر بيزاوته سي ايمس، بلكه پارتلش و خودكش حادثه لري عملگه آشيريليشي احتماليدن قورقه دي.

ميمنه ده عياللر برقع بيلن سپورت قيلرايكن، قيش و ساووق هواده سپورت قيليشلري هم اولر اوچون معمالي ايكني ايتيشگن. اولر سپورت ميدانلري اوستي آچيقليگي و قار يامغيردن مناسب سپورت مكاني يوقليگي دن شكايت قيليشگن.

بوندن مركزي دولت تمانيدن ميمنه ده عياللر اوچون جمنازيوم ايجاد ايتيليشي گه پول اجره تيلگني ايتيله دي. اما مذكور مبلغ هنوزگچه مقصد گه مطابق صرفلنمه گن.

Image caption :"بیز بو ییرگه دردیمیزنی دوالش اوچون کیله میز، لیکن قره نگ انه اویانده گی ایرککلر بیز اویيمیزگه قیتگونچه، بیزدن کوز اوزمیدیلر."

فارياب حاكمي محمدالله بتاش ميمنه ده دولت ييرلري موجود بولمه گنليگي سبب، مذكور مبلغ صرفلنمه ي قالگنيني ايتگن:" فاریاب ولایتی ده یلغوز عیاللرایمس، بلکه ایرکک لرگه هم اوستی یاپیق جمنازیم یوق، بونگه نیچه دلیل بارایکن، بیری بوکه بوحقده اجره تیلگن بودجه مرکز قیته ریلیب یوباریلدی بونگه سبب، دولتی زمین یوق ایدی، قانونگه هم دولتی ییربولمسه، بیزنی حقیمیزیوق که ییرلرنی استملاک قیلسک،اونه شواوچون بیزپولنی مصرف قیله آلمه دیک، بیزکوشش قیلیب توریب، بیز یقينده عیاللر قینچلیگي هم جمناریم دن وهم قول تیکیش لرینی ساتیش ده عیاللراوچون بیرمارکیت توزیله بوندن هم خلاص بوله دی".شمالی فاریاب ولایتی نینگ خلقی ورزش بوییچه جوده قدیم ییللردن بيري شغللنيب كيلگن.

اوغلاق، فوتبال ، قاچرتوپ گه اوخشه گن ورزش اوینلری، بوولایت یشاوچی لری اره سیده گی مشهور اوینلردن بولگن بیراق سونگی ییلرده ناتینچلیک لرهمده دولت مسوللرینی توجه سیزلیگی بواویین لرنی مذکور ولایت یشاوچیلری ایسیدن چیقه ریب قویگن.