اداري فساد افغانستانده اقتصاد رواجلنيشيني توسيب؛سرمايه ياتقيزيشگه آزه ييشيگه سبب بولگن

Image copyright UN

بوگون صلح وترقيات همكارليك موسيسه سي افغانستان ني فساد دن تازه لش شعاري بيلن ييغين اوتكزيب، فساد ني نشانله دي. بو اداره گه كوره، موجود اداري فساد مملكتده اقتصاد رواجلنيشي گه مانع بوليب، سرمايه گزارليك ميزاني ني آزه يتيرگن.

بو موسسه معارف و تعليم درگاه لرده گي اداري فساد كينگه يب، اوتگن ييل افغانستان شفافيت ني كوزه تووچي اداره سي اوزي نينگ گزارشيده افغانستان معارف وزيرليگي ده اداري فساد كينگه ييب باره ياتگنيدن خبربيرگني ني تيلگه آلگن.

بوگون اداره تمانيدن صادر ايتيلگن بير قطعنامه ده مملكت معارف وزيرليگي مداقعه و ايچكي ايشلر وزيرليكلري دن سونگ، افغانستان دولت بودجه سي نينگ اينگ يوقاري قسميني اوزلشتيرگنيني قيد ايتگن.

بو موسسه، مملكت تعليم وزيرليگيده بوروكراسي، لازم نظارت يوقليگي، خيالي معلملر رويخطي ني تيارلش و آيليك آليش، فسادنينگ چقور ايلديز آتگنيني كورسته دي.

مذكور موسسه افغانستان معارف وزيرليگي ده گي موجود فساد آلدي آلينيشي اوچون، وزيرليككده اصلاحات كيلتيريليشي ني سوره گن.

كانكور سيناوي اوتكزيليشيده شفافيت يوقليگي، تحصيلي بورسلرنينگ عدالتلي تقسيملنمه گنليگي، معارف وزيرليگي نينگ بودجه سي صرفلنيشيده شفافيت بولمه گني و مردم نينگ معارف حقيده معلومات گه ايريشه آلمه گنليكلريني، اساسي معمالردن ديب تاكيدله گن.

بيرلشگن ملتلر تشكيلاتي هم اداري فساد گه قرشي كوره شيشگه اعضا مملكتلرني ترغيبلب، اوني اجتماعي، سياسي و اقتصادي حادثه ديه تاكيدله گن.

بو تشكيلات گه كوره، بو توغريده خارجي سرمايه گزارلر اميدسيزلنيب، مملكت ده گي كيچيك تجارت فعاليتلري هم ممكن سيز بولگن. چونكه اولر فساد سبب فعاليتلريني باشله آلمسليگي ممكن.