بیش افغان محبوس گوانتانامو قماقخانه سیدن آزاد ایتیلدی

Image copyright AP

امریکالیک رسمیلر گوانتانامو قماقخانه سیده گی محبوسلردن تورت نفر افغان محبوسی آزاد ایتیلیب، افغانستان دولتی گه تاپشیریلگنینی ایتگن. امریکالیک مقاملرنینگ ایتیشلریچه، بو تورت محبوس افغانستان جمهور رییسی محمد اشرف غنی نینگ طلبی اساسیده آزاد ایتیلگن.

امریکا مدافعه وزیرلیگی تمانیدن نشرایتیلگن بیاناتده یازیلیشیچه، هرتمانلمه تیکشیروودن سونگ، بو تورت محبوس خطرلی بولمه گنی تصدیقلنیب، مملکت لریگه ییتکزیلیشیگه قرار آلینگن.

قوییب یوباریلگنلر اسملری خیرگل، شاه ولی خان، عبدالغنی و محمدظاهر ایکنی ایتیلگن.

اما بو شخصلر خصوصیده یعنی اولر طالبان حاکمیتی دوریده قندی مقام گه ایگه بولگنی باره سیده ارتیق معلومات بیریلمه گن.

امریکا نینگ افغانستانده گی ایلچیخانه سی بیر خبرنامه ترقه تیب افغانستان دولتی آزاد ایتیلگن شخصلر بیلن هرقندی یانداشسه مناسب بولیشیگه امریکا نینگ ایشانچی بارلیگی تاکیدلنگن.

شونینگ دیک خبرنامه ده قوییب یوباریلگن شخصلر تینچلیک برنامه لرینی ایلگری الیب کیتیش اوچون افغانستان دولتی بیلن همکارلیک قیلیشلری ممکن لیگی تاکییدلنگن.

2014 ییل جون آییده طالبان نینگ بیش یوقاری مرتبه لی قوماندانی قماقدن آزاد ایتیلیب، قطر دولتیگه تاپشیریلگن.

مذکور قوماندانلر طالبان قولیده اسیر قیلینگن امریکالیک بریگدال عسکرنینگ عوضیده قطرگه تاپشیریلگن.

بریگدال نینگ عوضیده طالبان ژریمی مدافعه وزیری معاونی محمدفاضل، هرات والیسی خیرالله خیرخواه، استخبارات اداره سی معاونی عبدالحق وثیق، طالبان نینگ شمالی ولایتلر بوییده گی قوماندانی نورالله نوری و شمالده یوقاری مرتبه لی قوماندانلریدن بولگن مولوی محمدنبی گوانتانامو قماقخانه سیدن آزاد ایتیلیب قطرگه تاپشیریلگن.

حاضر گوانتانامو قماق خانه سیده گی 130 محبس ایچیده 8 افغان محبوسی قماق جزاسینی اوته ماقده.