" ینگی کابینه باره سیده قرشیلیکلر هلی هم حل ایتیلمه گن"

Image copyright Reuters

ایریم مدنی جماعه فعاللری ینگی کابینه تیز اره ده اولوسی جرگه گه تانشتیریلیشینی جمهوررییس غنی دن طلب قیلدی.فعاللرگه کوره، کابینه کیچیتیریلیشی افغانستان امنیتی و اقتصادی گه منفی تاثیر قالدیرگن. اجتماعی عدالت نی تامین لش جنبش ناملی مدنی جماعه بوگون کابلده اوتکزگن مطبوعات انجمنیده کابینه یوق لیگی و وزیرلیککلر و مهم اداره لر تقدیرسیزلیگی اقتصاد ثبات سیزلیگی و امنیتی قیینچیلیک لرگه سبب بولگنینی ایتدی. اوشبو قوریلمه مسووللریدن احمدذکی بوحقده شوندی دیدی:" بیرتاماندن اورته گه کیلگن تیزیم کیلیشوو بیر حکومت دیر بودجه لایحه سی تصدیق لنمه گنی و سیاسی ثبات سیزلیک بیلن بیرگه باشقه تاماندن ملی بیردملیک حکومت مسووللری قدرت نینگ 50 – 50 بولیش بیلن بندلر." ذکی جنابلری بومساله ینگی کابینه نینگ تقدیر سیز قالیشی گه اصلی دلیل ایکنینی تاکیدله دی. او شونینگدیک ینگی حکومت دن نامزد وزیرلر تیز آره ده رای آلیش اوچون اولوسی جرگه گه تانشتیریلیشنی طلب قیلدی. اجتماعی ترماق لرده هم کوپچیلیک افغانلر کابینه کیچیکتیریلگنینی قتیق قاره لب کیلماقده لر. جمهوررییسلیک سرای منبع لردن بیری نینگ بی بی سی گه ایتیشیچه، کابینه تنیشتیریلیشی باره سیده قرشیلیکلر هلی هم موجود بولیب، نامزد وزیرلر تانشتیریلیشی کچیکتیریلگنیگه سبب بولگن. اوزاسمینی ایتیشینی ایسته مه گن بو منبع گه کوره، حکومت بیرگن وعده سیگه ماس کابینه اعلان ایتیلیشی اوچون جدی ایشلب کیلماقده . ملی بیردملیک حکومتی نینگ ایشگه باشله شیدن قریب اوچ آی اوتماقده، جمهوررییس محمد اشرف غنی ایشی نینگ بیرینچی کونیده 45 کونده ینگی کابینه اعلان ایتیلیش وعده سینی بیرگن ایدی. اما بووعده عملی بولمه دی . اوندن کیین دسامبر ای نینگ اولیده اروپا سفری عرفه سیده ، کابینه اوچ و یا تورت هفته جریانیده اعلان ایتیلیشی ممکن لیگینی ایتگن ایدی. حاضر اوچ هفته اوتماقده. .