ملی بیردملیک حکومتی عمریدن یوز کون اوتدی

Image copyright Reuters

افغانستان ملی بیردملیک حکومتی نینگ تشکیل ایتیلگنیگه یوز کون تولدی. اما بو مدت ایچیده حکومت خلققه بیرگن وعده لریدن اکثریتینی عملی قیلیشگه قادر بوله آلمه گن. حکومت حتی کابینه اعضالرینی هم تعیینلشده موفق بولمه گن. بو مسله مردم آره سیده قطار تشویشلرگه سبب بولگن. محمد اشرف غنی رهبرلیگی ده گی افغانستان ملی بیردملیک حکومتی نینگ تشکیل ایتیلگنیگه بوگون یوز کون بولدی. غنی جنابلری اوتگن میلادی ییل نینگ 29 سپتمبر آییده مملکت جمهور رییسی صفتیده قسم یاد مراسمینی اوتکزدی. او ینگی اصلاحات کیلتیریش لایحه لری باره سیده مردمگه وعده بیریب، تیزآره ده قضاییه، مقننه و اجراییه بولیملریده اصلاحات کیریتیشی حقیده ایشانچ بیلدیرگندی. اهالی ملی بیردملیک حکومتی تشکیل ایتیگنی و سیلاو ترغیبات جریانیده بیریلگن وعده لردن کته امیدلرنی کوتیب توریشگندی. حکومت نینگ یوز کون ایچیده عملی قیله دیگن وعده لرینی نظارت قیلگن بیر مستقل اداره، بیریلگن وعده لردن اکثر قسمی هنوزگچه عملی قیلینمه گن دییدی. یوز کون ویب صحیفه سی گروهی مدیری احمد شجاع:"بوگون ملی بیردملیک حکومتی نینگ تشکیل ایتیلگنیگه یوز کون بولدی. بو یوز کون ایچیده ملی بیردملیک حکومتی سیلاو ترغیبات کمپاینلریده بیرگن وعده لریدن فقطگینه تورته سینی عملی قیلگن. مثال قیلیب ایتگنده، امریکا بیلن خوفسیزلیک کیلیشوونامه امضالنگنی، جمهور رییسلیک اداره سی نینگ وزیرلر دارالانشا کینگشی عمومی توزیلیشی چوکاتی گه قویشیلگنی، نیویارک تایمز درکچیسی سفریگه رخصت بیریلگنی و معلومات آلیش قانونی نینگ تصدیقلنگنی و ایشگه سالیش ایشلری تکمیل بولگن. باشقه 23 حالت اوستیده ایش باشلنگن، اما هنوزگچه تکمیل بولمه گن". یوز کون ناملی ویب صحیفه سی نینگ تیکشیروولریگه قره مه ی، افغانستان بیرقطار اهالیسی جمهور رییس محمد اشرف غنی اوزی یکه لیکده حکومت تشکیل ایتگنده ایدی، بیرگن وعده لرینی عملی قیلیشی ممکنلیگی نی تاکیدله ماقده لر. بلخ بیلیم یورتی استاذی عارف شمسی حکومت حاضر ایکی کیشی اورته سیده تقسیم لنگن دییدی. عین حالده، باشقه بیر تعدادی شخصلرگه کوره، ملی بیردملیک حکومتی نه فقط اهالی نینگ کوتگن امید آرزولرینی رویابگه چیقرمه گن، بلکه اوستیگه اوستک معمالر کوپه ییشگه سببچی بولگن. بلخ ضیالی لریدن بیری محمدانور مدبیر، جمهور رییس اشرف غنی وزیرلر و ولایت حاکملرینی سرپرست اعلان قیلگنی توزوم ده الغاو دلغاو یوز بیریشیگه هم آلیب کیلدی دییدی. اما شونگه قره مسدن، باشقه بیرتعداد شخصلر کابینه تنیشتیریلیشی کیچیکتیریلگنلیگی گه، ملی بیردملیک حکومتی ینگی کابینه ده مناسب، کارفهم و خذمتگار شخصلر تعیینلنیشی گه سعی و حرکت قیله یاتگنیدن خوش بین. جمهور رییس اشرف غنی و اونینگ حکومتی اهالیگه ساغلیق خذمتلر کورستیلیشی، ایچکی مهاجرلراوچون مناسب تعلیم شرایط لر یره تیلیشی، کوکنار ایکیش و چکیش نی ایلدیزیدن قوریتیش، اوقیتووچی، عسکرلر و دولت خادملری آیلیکلری میزانی نی آشیریش، درآمد قولگه توشیریش اوچون تعلیم درگاه لرینی خصوصی و دولت موسسه لریگه ایلنتیریش، دولت ملازملری نینگ بایلیگینی عدلی و قضایی اداره لرده رویخطه گه آلیش، دولت نینگ فسادگه باتگن خادملرینی جزالنتیریش، مملکت قتناو یوللری خوفسیزلیگی نی تامینلش، قوراللی مخالفلر بیلن صلح مذاکره لری قیته باشلش و شونگه اوخشه گن اونلب وعده لرنی بیرگن. بو وعده لر اولگی یوز کون ایچیده عملی قیلینمرایکن، اکثر اهالی افغانستان ینگی حکومتی کیله سی بیش ییل ایچیده هم بیرگن وعده لرینی عملی قیله آلمسلیګی ممکنلیګی نی ایتماقده لر'