ملی امنیت اداره سی: حقانی ترماغی گه باغلیق انتحاری هجوم تشکیلشتیروچی شخص کابلدن قولگه آلیندی

Image copyright AFP

افغانستان ملی امنیت اداره سی حقانی ترماغی گه باغلیق تروریستی و انتحاری هجوملرنی تشکیلشتیروچی شخص نینگ باشقه بیر انتحارچی بیلن پایتخت کابلدن قولگه آلینگنینی ایتگن. ملی امنیت اداره سی نینگ خبرنامه سیده یازیلیشیچه بو شخص باشقه بیر انتحارچی بیلن مخصوص عملیات جریانیده کابل ولایتی نینگ بگرامی تومنیدن توتقینگه آلینگن. امنیت اداره سی نینگ ایتیشیچه بوشخصلر حقانی ترماغی نینگ پاکستانده گی مدرسه سیده جلال الدین حقانی اوغلی نظری استیده انتحاری هجوملر بویجه تعلیم آلگنینی اعتراف قیلگنلر. افغانستان ملی امنیت اداره سی بو شخص لر توتقینگه آلینیشی بیلن قانلی بیرهجوم آلدی آلینگنینی ایتگن. حقانی ترماغی کابل وباشقه ولایت لرده یوزبیریب کیله یاتگن قطار انتحاری هجوم وناقرارلیک لرده قولی بارلیگی ایتیلماقده، اما بوخصوصده حاضرگه قدرهیچ نرسه دیمه گن.

باشقه تاماندن شمالی بغلان ولایتیده طالبان عصیانچیلری خصوصی بیر شرکت نینگ آلتی خادمینی اولدیرگن. بغلان ولایتی نینگ پلیس سوزلاوچیسی جاوید بشارت بی بی سی بیلن بولگن صحبتیده بو حادثه بغلان مرکزی تومنی نینگ چهارشنبه تپه منطقه سیده روی بیرگنینی ایتگن. اونگه کوره قوراللی مخالفلر هوا یمانلیگیدن فایده له نیب شرکت ایشچیلرینی هجومگه توتگن. بوخصوصی شرکت باره سیده حاضرگه قدرهم معلومات بیریلمه گن. مذکورحادثه ده بیرنفرهم یره لنگن ، باشقه بیر ایشچینی هم طالبان اوزلری بیلن آلیب کیتگن. طالبان محلی خبرنگار لربیلن علاقه قوریب حادثه مسوولیتی نی اوز ذمه سیگه آلگن.