قندوزده توقنه شوولر دوام ایتماقده

تاجیکستان بیلن چیگره داش بولگن قندوز ولایتی نینگ امام صاحب تومنیده حربی عملیات بیش کون الدین یولگه قوییلگن ایکن

محلی رسمیلرنینگ ایتیشلریچه یوزبیریب کیله یاتگن توقنه شوولر نتیجه سیده التمیش بیر قوراللی طالب هلاک بولگن وییللیک دن ارتیق طالب هم یره لنگن

قندوزولایتی نینگ پلیس قوماندانلیگی سوزچیسی سید سرور حسینی بی بی سی بیلن بولگن اونلب قیشلاق هم طالبان دن تازلنگنینی تیلگه آلیب بوحقیده شوندی دیدی:"امام صاحب تومنی نینگ ایریم قیشلاق لریده عملیات هلی هم دوام ایتماقده، بو عملیات جریانیده اوتتیزگه یقین قیشلاق طالبان عصیانچیلریدن تازلنگن، توقنه شوولرده طالبان نینگ بیرنیچه محلی قوماندانی داخل التمیش بیر نفری هلاک ایتیلدی. اولر اره سیده چیت ایللیک عصیانچیلرهم موجود، اما قیسی مملکت دن بولگنی حاضرگه قدرهم معلوم ایمس"

اما طالبان گروهی محلی رسانه لرگه پیام یوللب یوزبیرگن توقنه شوولرده اوچ قوراللی طالب هلاک بولگنینی تن آلگن. همده بوگروه، توقنه شوولرده افغان امنیتی کوچلریگه اغیر تلفات ییتکیزیلگنینی هم ادعا قیلگن

عینی حالده محلی رسمیلر قندوزولایتی نینگ دشت ارچی تومنیده هم توقنه شوولر دوام ایتیب کیله یاتگنینی ایتگن؛ بیراق احتمالی تلفات باره سیده ایککی تمان هم حاضرگه قدر هیچ قندی مناسبت بیلدیرمه گن

شمال شرقی قندوز ولایتی نینگ امام صاحب و دشت ارچی تومنلری داخل ایریم حدودلریده نه فقط ایچکی بلکه خارجی عصیانچیلر هم فعال بولگنی ایتیلماقده.شونینگ دیک بوندن الدین طالبان فعالیتی قندوز شهری یقینده گی محللرده هم کوزه تیلگنی خصوصیده خواطیر بیلدیریلگن ایدی