افغانستان ده داعش مسوولی ملاعبدالروف هلاک ایتیلدی

افغانستان ملی امنیت اداره سی بیر خبرنامه ترقه تیب داعش گروهی نینگ جنوب غربده گی مسوولی ملا عبدالروف "خادم " حربی عملیات جریانیده هلاک ایتیلگنینی تصدیق له دی.

ملی امنیت اداره سی نینگ معلوم قیلیشیچه، جنوبی هلمند ولایتی نینگ کجکی تومنیده یولگه قوییلگن حربی عملیات نتیجه سیده ملاعبدالروف بیش یولداشی بیلن بیرگه هلاک ایتیلگن.

شونینگ دیک ملی امنیت اداره سی ملا عبدالروف نینگ نشانگه آلیش خوف سیزلیک کوچلری نینگ سونگی بیر آییده گی اساسی هدف لریدن بیری ایکنلیگینی تاکیدله گن.

اما بعضی بیر خبرلرگه کوره، ملاعبدالروف " خادم " امریکا نینگ هوای هجومیده هلاک ایتیلگن. افغانستان خوف سیزلیک اداره سی بوخصوصده هیچ قندی معلومات بیرمه گن.

محلده گی قوم باشلیغ لری، بی بی سی بیلن بولگن صحبتیده یولده کیته یاتگن بیر موتر هوا دن نشانگه آلینگنینی ایتگنلر. بی بی سی نینگ کابلده گی خبرنگاری دیوید لاین نینگ یازیشیچه، ملا عبدالروف طالبان رهبرلری بیلن قرشی لیک بیلدیرگنیدن سونگ داعش گروهی بیراغینی کوتاردی.

دیوید لاین نینگ یازیشیچه داعش نینگ افغانستانده کوپ طرفداری بولگنی هیچ بیر مستقل منبع تمانیدن تصدیق لنمه گن.

سونگی اییلرده ملا عبدالروف بیر ویدیو تسمه نشر ایتیب داعش رهبری ابوبکر البغدادی بیلن بیعت قیلگنینی اعلام قیلدی. بغدادی جنابلری هم پیام یوللب اونینگ بیعتی نی قبول قیلدی. بوبیرینچی مرته دیرکه داعش گروهی نینگ قوماندانلریدن بیری افغانستانده هلاک ایتیله دی.