ننگرهارده نامعلوم شخصلر قیزلر مکتبیگه اوت قوییشگن

ننگرهار ولایتی معارف اداره سی سوزلاوچیسی نینگ بی بی سیگه بیرگن معلوماتی گه کوره، بو مکتب مومندره تومنیده جایلشگن بولیب، اونینگ اکثر اوقووچیلری قیزلر تشکیل بیرگن.

اونگه کوره، بو مکتبده ایککی مینگگه یقین شاگرد تعلیم آلیشرایکن.

ننگرهار ولایتی پولیس رسمیلری هم بو واقعه اوتگن کون کیچقرون یوزبیرگنی نی ایتیب، مکتب نینگ اکثر صنفلری اوتگه یاندیریلگنی نی معلوم قیلگن، اما بیران کیشی گه ضرر ـ زیان یتکزیلمه گنی نی تاکیدله گن.

محلی رسمیلر واقعه عامل لرینی قولگه آلیش اوچون تحقیقات باشلنگنی دن خبر بیرگن.

هرچند طالبان گروهی حاضرگه قدر واقعه مسولیتی نی اوز بوینیگه المه گن، اما ننگرهار معارف اداره سی ملازملری محلی ژورنالیست لرگه ایتکن که، طالبان گروهی بو ولایت نینگ بیرقطار اولسواللیک لریده اکثر کتبلر ایشیگینی یاپگن و اگر دولت طالبان طالبان نینگ تکلیفلریگه ایجابی جواب بیرمه سه، مکتبلر ایشیگی نی آچیشگه اجازت بیرمسلیگی باره سیده آگاه لنتیرگن.

بوندن قریب اوچ آی آلدین طالبان تهدیدلری عاقبتیده ننگرهار ولایتی نینگ بیرقطار تومنلریده 38 مکتب طلبه لر یوزیگه یاپیلگندی.

دولت قماقخانه لریده سقلنه یاتگان بیر قنچه طالب جنگره لری نینگ قویب یوباریلیشی بوگروه نینگ دولت دن اساسی طلبی دیر.

بی بی سی نینگ محل ده گی مخبری نینگ ایتیشیچه، اوتگن کون اوروش میدانیده طالبان گروهی نینگ بیر جنگچیسی اولدیریلیشی آرتیدن، طالبان اگر اولدیریلگن طالب جسدی بو گروه گه قیته ریلمه گن تقدیرده، طالبان بو ولایت ده گی مکتب و ساغلیک مرکزلریگه قرشی هجوم اویویشتریش باره سیده آگاه لنتریگندی.

پایتخت کابل شرقیده جایلشکن ننگرهار ولایتی افغانستان نینگ ناتینچ ولایتلریدن بیری سنه له دی.

بو ولایت پاکستان نینگ قبایل منطقه لری بیلن چیگره داش و عصیانچیلر اکثر تومن و چیکه حدود لرده فعال فعالیت قیلیشه دی.