افغانستان قالگن نامزد وزیرلر رویخطی نی اعلان قیلدی

بوندن قریب آلتی آی آلدین تشکیل ایتیلگن ملی بیردملیک حکومتی هنوزگه قدر کابینه اعضالرینی تکمیل قیلیشگه قادر بوله آلمه گن. جمهور رئیسلیک سرایی تمانیدن نشر ایتیلگن خبرنامه گه کوره، تجارت وصناعت وزیرلیگی اوچون همایون رسا، اخبارات ومدنیت وزیرلیگی اوچون عبدالباری جهانی، زراعت و چارواچیلیک وزیرلیگی اوچون اسدالله ضمیر، چیگره و قبیله وزیرلیگی اوچون محمدگلاب منگل، فواید عامه وزیرلیگی اوچون محمد بلیغ، اقتصاد وزیرلیگی اوچون عبدالستار مراد، ترانسپورت و هوا یوللری وزیرلیگی اوچون محمدالله بتاش، معارف وزیرلیگی اوچون اسدالله حنیف بلخی و شهر قوریش وزیرلیگی اوچون سید سادات منصور نادری تنیشتیریلگنلر. شونینگ دیک، عدلیه وزیرلیگی اوچون عبدالبصیر انور، مخابرات وزیرلیگی اوچون عبدالرزاق وحیدی، عیاللر وزیرلیگی اوچون دلبر نظری، مخدرماده لرگه قرشی کوره ش وزیرلیگی اوچون سلامت عظیمی، عالی اوقوو وزیرلیگی اوچون فریده مومند، اجتماعی ایشلر وزیرلیگی اوچون نسرین اوریاخیل و سوو وبرق وزیرلیگی اوچون علی احمد عثمانی لر تنیشتیریلگن. بو رویخط ده ملی مدافعه وزیرلیگی اوچون نامزد نینگ اسمی کیریتیلمه گن. بوندن آلدین ملی مدافعه وزیرلیگی اوچون نامزدلیگی قوییلگن شیرمحمدکریمی افغانستان پارلمانی نینگ ایشانچ آوازلرینی قولگه کیریتیشگه قادر بوله آلمه دی. مذکور رویخط ده عالی اوقوو وزیرلیگی، اجتماعی ایشلر، عیاللر و مخدرماده لرگه قرشی کوره ش وزیرلیکلری اوچون عیاللر تنیشتیریلگن. اما هنوزگچه کابینه نینگ سکیز اعضاسی پارلماندن ایشانچ آواز قولگه کیریتگن خلاص. بو نامزد وزیرلر جمهور رییس اشرف غنی و اجرائیه رئیسی عبدالله عبدالله لرنینگ امریکاگه قیلگن سفریدن بیرکون آلدین، اعلان ایتیلماقده. افغانستان اولوسی جرگه معاونی محمد نظیر احمدزی نینگ بی بی سیگه ایتیشیچه، مذکور شخصلرنینگ اسم شهرتلری و حجتلری دوشنبه کونی رسمآ مجلسگه تاپشیریلیشی ممکن و اولرنینگ حجتلری نی اوچ کون ایچیده کوریب چیقیله دی.