مزارشریفده یوزلب آدم نمایش اویوشتیردی

مزارشریف ده مینگدن آرتیق آدم مملکتده روی بیره یاتگن گیروگان گیرلیک حادثه لری آشیب باره یاتگنی وافغانستان دولتی بو حقده اعتبار بیرمه یاتگنی باره سیده نمایش اویوشتیردی.

بو نمایش ایرته لب ساعت اون ده مزارشریف شهری نینگ آریانا منطقه سیدن باشله نیب ولایت کینگش ایشیگی آلدیگه قدر بیر ساعت دوام ایتدیریلدی.

برچه سی هزاره قومیدن تشکیل تاپگن بو نمایشچیلر، افغانستان ملی بیردملیک دولتی نی اوغیرلنگن آدملرنینگ قوییب یوباریلیشی باره سیده جیم توره یاتگنلیککه عیبلشدی.

بو نمایشچیلر، اوتگن ایکی آیی جریانیده قریب 60 نفر هزاره اوغیرلنگن و اولدیریلگنینی ادعا قیلماقده لر.

بولر بوندن بیر آی آلدین غزنی یولیده نامعلوم شخصلر تمانیدن اوغیرلنگن 31 نفر تیزلیک بیلن آزاد ایتیلیشی و یوللرنینگ باردی کیلدی خوفسیزلیگی تامینلنیشی نی سوره ماقده لر.

نمایشچیلر شونینگ، جمهور رییس اشرف غنی نی ناکارلیک و یالغان وعده بیرگنلیکککه عیبلب، اونینگ استعفاسینی طلب قیلیشماقده.

بو نمایش اعتراض ده بلخ ولایتی اهالی سی نینگ اولوسی جرگه ده گی بیر تعداد وکیللری هم قتنه شیب، افغانستان جمهور رییسی نینگ یمن مسله سی گه عاید سعودی عربستانی نی حمایه قیلیشی ممکنلیگی باره سیده گی قرارینی قاره لب، مملکت حاضرگی وضعیتی بونده ی حمایه لش گه وقت بیرمسلیگی نی تاکیدلشدی.

اعتراضچیلرهم، افغانستان جمهور رییسی نینگ بو حقده گی قراریگه قرشی شعار بیریشدی.

اعتراضچیلر، خواهش ایستکلری انابتگه آلینمه گن تقدیرده، کابلگه قدر نمایش اویوشتیریشلری ممکنلیگی باره سیده آگاه لنتیردی.