فیفا: سیلاو اصلاحات کمیسیونی مسلکی ومستقل ایمس

Image copyright no credit

افغانستان ایرکین وعدالتلی سیلاو بنیادی، فیفا حکومت دن سیلاولر اصلاحات کمیسیونی اعضالری باره سیده قیته کوریب چیقیشی نی سوره گن. بوکمیسیون جمهور رئیس امریکا گه سفر قیلمسدن آلدین تشکیل ایتیلدی.

فیفا نینگ ایتیشیچه، بو کمیسیون ده مسلکی بولمه گن و حکومت گه طرفدار شخصلر تعیین ایتیلگن.

محمد اشرف غنی ایلک بار تحلیف مراسمیده سیلاولرده اصلاحات کیریتیش وعده سینی بیردی.

اونینگ بوحقده گی وعده سی بوندن ایکی هفته آلدین امریکا گه قیلگن سفریدن بیرکون مقدم عملگه آشدی.

او، سیلاولرده اصلاحات کیریتیش بوییچه مخصوص کمیسیون ایجاد ایتیلیشی گه فرمان بیردی.

کمیسیون رییسی کیم بولیب بولمسلیگی مسله سی باره سیده جنجل پیدا بوله باشله دی. حاضر ایسه افغانستان ایرکین و عدالتلی سیلاو بنیادی فیفا بوکمیسیون اعضالرینی مسلکی سیز و سیاسی دیه تاکیدله ماقده.

بوحقده فیفا بنیادی رییسی محمد یوسف رشید:"بو خصوصده تشکیل ایتیلگن سیلاو اصلاحات کمیسیونی اعضالری مسلکی بولمه ی، مستقل ایمسلر.

اونینگ ترکبیده متخصص بولمه گن شخصلر و حاضرگی حاکمیتگه شیریک ایکی تیم تمانیدن تعیین ایتیلگن.

ایش لایحه لری هم تشویشلنرلی، بو لایحه ده اولرنینگ صلاحیتلری چیکلنتیریلگن و نهایت قرارنی هم جمهور رییس و اجراییه رییسی قبوله دی".

فیفا شونینگدیک، افغانستان اولوسی جرگه سی اعضالری اورته سیده فکر سوره ش حسابات اوتکزیب، نماینده لردن اکثریتی سیلاولر اصلاحات کمیسیونی بی طرف بولیشی باره سیده تاکیدلشگن.

باشقه تماندن، سوراق اوتکزیلگن 125 نماینده دن 19 ته سی بوحقده فکر بیلدیریشدن واز کیچیشگن.

افغانستان حکومتی نینگ ایتیشیچه، اولوسی جرگه اعضاسی شکریه بارکزی باشچیلیگیده گی سیلاولر صالاحات کمیسیونی سیلاولر قانونلری و سیلاو کمیسیونی ده اصلاحات کیریتیش مقصدیده تشکیل ایتیلگن.