اشرف غنی بدخشانده تیروریستلر فعالیتی دن خواطر بیلدیردی

Image copyright

افغانستان جمهور رییسی محمد اشرف غنی بدخشان ولایتی جرم تومنیده قوراللی مخالفلرنینگ هجومی عاقبتیده ملی اردو عسکرلریگه آغیر تلفات ییتکزیلگنی آرتیدن،بوگون بو ولایت گه سفر قیلگن.

او بدخشانده تیروریستلر جای آلگنیدن خواطر بیلدیرگن.

افغانستان جمهور رییسی محمد اشرف غنی بدخشانگه قیلگن سفریده او ولایت محل مسووللری، مدنی جماعه چیلیک و عیاللر بیلن اوچره شیب، ولایت ده اوتگن جمعه کونی روی بیرگن قانلی حادثه نی قاره لب، بونگه خلق ارا تیرورچیلرنی مسوول دیه تاکیدله دی.

اونینگ ایتیشیچه، تیروریستلر عسکرلرنی اولدیریش و اولرنینگ باشینی کیسیش بیلن، حکومت نی ضعیفلشتیره آلمه یدی.

او بدخشان ده گی نابرقرارلرگه تورت مسله نی عامل قیلیب کورستدی:بیرینچی عامل، بدخشان نینگ بایلیگی سوی استعمال قیلینیب، تینچسیزلیکلرگه سبب بوله دی. ایکینچی عامل مسوولیت سیز قوراللی شخصلرنینگ فعالیتی. بیراولرنی اولدیریش دن باشقه لرنینگ فایده لنیشی، اوچینی عامل جنگرلر فعالیتی و تورتینچی عامل برچه عامللرنینگ یامانی بختگه قرشی بو تیروریستلردیر".

غنی جنابلری بدخشانده گی حادثه ده بی فرقلیکده عیبلنگن ملازملر بیلن جدی یانده شیلیشی نی ایتیب، وطن نی حمایه قیلگن عسکرلر و منصبدارلرنینگ تقدیرلنیشی نی تاکیدله دی.

او شونینگ دیک، بدخشان اهالی سی و دین عالملری دن تیروریستلر گه قرشی توریشلرینی سوره دی.

طالبان گه باغلیق کتته بیر گروه، اوتگن جمعه کونی بدخشان نینگ جرم تومنیده گی بیر نیچه خوفسیزلیک پوسته لریگه هجوم قیلیب، کمیده 20 عسکرنی اولدیریشدی. مذکور هجومده، عسکرلردن سیکیز ته سی نینگ باشی تنه سیدن جدا قیلینگن.

بو حادثه آرتیدن، افغانستان دولتی واقعه دلیللرینی تیکشیریش اوچون ایچکی ایشلر وزیری نورالحق علومی باشچیلیگیده بدخشانگه بیر هییت جونه تدی.

بدخشانده گی ملی اردو عسکرلریگه ییتگن کته تلفات حادثه سی، اولوسی جرگه نماینده لری اینیقسه بدخشان ولایتی وکیللری نینگ قتیق اعتراضلریگه سبب بولدی.

عین حالده، افغانستان مدافعه وزیرلیگی مملکت خوفسیزلیک کوچلری جرم تومنی نینگ قوراللی مخالفلر تصرفیگه اوتگن منطقه لرینی قیته ریش آلیش اوچون تیارگرلیک کوره یاتگنینی اعلان قیلگن.

شرق دن چین شمالدن تاجیکستان بیلن چیگره داش بولگن بدخشانده، ایتیلیشیچه، افغانی طالبلر صفیده بیرقطار خارجی جنگریلر هم جنگ قیلیشه دی.

اما افغانستان جمهور رییسی محمد اشرف غنی اوزی نینگ بو ولایت گه قیلگن بوگونگی سفریده او ولایت اهالیسیگه بدخشان نی تیرورچیلردن تازه لشینی وعده بیردی.