افغانستان ملی امنیت اداره سی بیلن پاکستان ملی خوف سیزلیک اداره سی کیلیشوونامه امضاله دی

Фото муаллифлик ҳуқуқи NDS

بو اداره سوزلاوچیسی حسیب صدیقی، کابلده یولگه قوییلگن خبری انجمنده ایتیشیچه بو کیلیشوونامه ایکی مملکت اورته سیده معلوماتی همکارلیک مقصدی بیلن امضالنگن.

اونینگ ایتیشیچه بو همکارلیک حربی، مالی، سیاسی وتهدیدلرگه مقابله قیلیش اوچون قوشمه معلوماتی همکارلیک قیلیش مساله لریدن عبارت بولگن.

افغانستان ملی خوف سیزلیک اداره سی شونینگ دیک بو کیلیشوو نامه ده دشمن لریمیز کیم وقیسی منبع لر امنیتی تهدید حسابلنه دی دیگن موضوع لر آچیقلنگنینی معلوم قیلدی.

صدیقی جنابلری نینگ تاکیدلشیچه بونده تورلی منطقه لرده پناهگاه سی بولگن اشدی وترورچی گروه لر برچه سی آتی کیلگن.

او مثال بیلن داعش یا اسلامی دولت والقاعده گروهی دن آت توتدی.

حسیب صدیقی جنابلری بو کیلیشوونامه اساسیده پاکستان اسخبارات اداره سی افغانستان ملی خوف سیزلیک اداره سی خادم لرینی جهازلش واورگته دیگن مساله باره سیده ایریم چیققن خبرلرنی رد ایتدی.

اما اونینگ تصدیقله شیچه ایکی مملکت استخبارات اداره لری اورته سیده "علاقه لی افسرلر" المه شیشی ایکی تشکیلات اورته سیده تیزمدتده هماهنگلیک بولیش اوچون کیلیشیلیب بو کیلیشوونامه ده قید ایتیلگن.

افغانستان ملی امنیت اداره سی پاکستان بو مرته اوز تعهدلرینی عملی قیلیب وصداقت روحی بیلن همکارلیک قیلیششیگه امید بیلدیردی.

بو کیلیشوونامه نینگ امضاله نیشی باره سیده گی چیققن خبرلر افغانستان ملی مجلسی نینگ ایریم اعضالری نینگ جدی مناسبت لریگه سبب بولدی.

ملی مجلس تاماندن بوباره ده ملی امنیت مسووللری کیلیب ایضاح بیریشی اوچون مدافعوی، خلق ارا علاقه لر وایچکی امنیت کمیسیون لریگه وظیفه بیریلدی.