Қирғиз мухолифат лидери икки ойга ҳибс этилди

Фото муаллифлик ҳуқуқи Internet
Image caption Ўмирбек Текебаев

Қирғизистонда мухолифат лидери Ўмирбек Текебаев маҳкама қарори билан яна икки ойга ҳибс этилган. Текебаев сақланаётган бино қаршисида эса унинг тарафдорлари намойишни давом эттиришган.

Қирғизистон Давлат миллий хафвсизлик қўмитаси матбуот хизматининг билдиришича, мухолифатдаги "Ота макон" фракцияси лидери "коррупция" билан боғлиқ жиноятларда айб қўйилган.

Первомаский туман маҳкамаси қарори билан 2017 йилнинг 25 апрелигача ҳибсда сақлаш чораси қўлланилган.

Текебаев сақланаётган Давлат миллий хафвсизлик қўмитаси биноси олдида унинг тарафдорлари йиғилган.

Намойишчиларнинг маълум қилишича, норозилик акцияси ҳафтада дам олиш кунларидан ташқари 2-3 марта ўтказилади.

28 феврал куни намойишга чиққанларнинг сони бир кун олдингидан камроқ бўлган.

Олдинроқ Бишкек милицияси пойтахтга Россия президенти Владмир Путиннинг ташрифига рағман, намойишларни тарқатмаслигини билдирган эди.

Коррупция айби

Ўмурбек Текебаев якшанба куни "Манас" халқаро ҳаво қўналғасида қўлга олинган.

25 февраль куни Қирғизистон Бош прокуратураси мухолифат раҳбарига қарши "коррупция" ва "фирибгарлик" айблари бўйича жиноий иш қўзғатганди.

Айни иш россиялик ишбилармон ва қатор телеалоқа ширкатлари эгаси бўлган Леонид Маевский аризасига биноан очилган.

Даъвогарга кўра, ҳали 2010 йили Қирғизистон муваққат ҳукумати раиси муовини бўлиб ишлаган Текебаев ундан бир миллион доллар маблағ олган.

Бунинг эвазига эса Қирғизистондаги энг йирик уяли алоқа ширкати - "Мегаком" бошқарувини беришни ваъда қилган.

"Текебаев ўз ишини бажармаган ва олган пулини ҳам қайтармаган. Шунингдек, мазкур масалада бирон маълумот тарқатилса ё пулни қайтариш талаби тўхтамаса, қасос олиш билан таҳдид қилган" - дея баёнот берган Қирғизистон Бош прокуратураси.

Жиноий иш очилган пайти Венада хизмат сафарида бўлган Ўмурбек Текебаев ўзига қўйилаётган айбловларни ва россиялик ишбилармондан бир миллион доллар олганини рад этган.

Унинг айтишича, ўтган йили охирида Президент Атамбоев амалга оширган конституцион ўзгаришларга қарши чиққани учун таъқибга тутилмоқда.

Олдинроқ Ўмурбек Текебаев бошқарадиган "Ота Макон" мухолиф партиясининг яна икки аъзоси - собиқ Адлия вазири Алмамбет Шикмаматов ва собиқ Бош прокурор Аида Саляноваларга қарши ҳам Қирғизистон ҳукумати жиноий иш очган эди.

Би-би-си Ўзбек хизмати билан Whatsapp, Telegram ва Viber да: +44 78-58-86-00-02

ТЕЛЕГРАМДА ЭСА каналимиз - https://telegram.me/bbcuzbek ёки BBCUZBEK

Instagram - BBC UZBEK

Twitter - BBC UZBEK

Odnoklassniki - BBC UZBEK

Facebook- BBC UZBEK

Google+ BBC UZBEK

YouTube - BBCUZBEK (https://www.youtube.com/user/bbcuzbek)

Skype - bbcuzbekradio

bbcuzbek.comга тўсиқ бўлса, uzbekweb.netга киринг

Алоқадор мавзулар