BBC navigation

Ravshan Ermatov hakamlik qilgan o‘yinda "Barsa" g‘olib chiqdi

Сўнгги янгиланиш 19 декабр 2011 - 17:30 GMT

"Barselona" ikki bor Jahon chempionligini qo‘lga kiritib, klublar orasida yangi rekord o‘rnatdi

Klublar o‘rtasidagi Jahon chempionatining final bosqichida Braziliyaning "Santos"ini yirik hisob bilan mag‘lub etgan Ispaniyaning nahang "Barselona"si ikkinchi bor dunyoning eng zo‘r klubiga aylandi.

Yaponiyaning Yokogama shahrida bo‘lib o‘tgan uchrashuvda "Barsa" raqibini 4:0 hisobida yakson etdi.

"Nissan" stadionidagi o‘yinni o‘zbekistonlik dongdor hakam Ravshan Ermatov boshchiligidagi hakamlar hay‘ati boshqardi.

Ispaniyaliklar bellashuvning birinchi qismidayoq o‘zlarining nimalarga qodirliklarini isbotlab qo‘yishdi.

"Santos" darvozasini zabt etgan to‘rtta to‘pdan uchtasi dastlabki 45 daqiqaning o‘zidayoq kiritildi.

Uchrashuvning birinchi va yakuniy to‘pini uchinchi bor "Jahonning eng zo‘r futbolchisi" maqomiga da‘vogarlik qilayotgan Lionel Messi o‘z hisobiga yozdi.

"Barselona" so‘nggi g‘alabasi ortidan turnir rekordsmeniga ham aylandi.

Ispaniya nahangiga qadar biror bir jamoaga ikki bor klublar o‘rtasida Jahon chempioni bo‘lish nasib etmagan.

Neymar, Braziliya yulduzi:

"Barselona"ni to‘xtatib bo‘lmaydi. Klub o‘zining ajoyib futbolchilari bilan hozir dunyodagi eng zo‘r jamoadir"

"Barsa" yarim finalda bu yilgi Osiyo chempioni, Quvaytning "Al-Sadd"ini ham xuddi shunday hisob bilan mag‘lub etgandi.

Karles Puyol jamoasining finaldagi g‘alabasini "Al-Sadd"ga qarshi o‘yinda oyog‘ini sindirib olgan yulduz hujumchilari David Vilьyaga bag‘ishlagan.

U, "Maydonda qoyilmaqom futbol namoyish etganliklari"ni aytgan.

Braziliyaning tilga tushib kelayotgan yosh yulduzi Neymar ham "Barsa"ning mahoratiga tan bergan.

"Barselona"ni to‘xtatib bo‘lmaydi. Klub o‘zining ajoyib futbolchilari bilan hozir dunyodagi eng zo‘r jamoadir".

Ravshan Ermatov esa, 2008 yilda ham Yaponiyada bo‘lib o‘tgan klublar orasidagi Jahon chempionatining final bellashuviga hakamlik qilgan va o‘zining mahorati bilan tilga tushgandi.

O‘zbekistonlik dongdor hakam kuni-kecha Quvaytning "Al-Sadd" jamoasi g‘olib chiqqan Osiyo Chempionlar ligasining yakuniy uchrashuvini ham boshqargandi.

* to'ldirish shart bo'lgan qator

Ушбу мавзуга оид кўпроқ материаллар

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.