"Ҳалол" стандарти расман жорий этилди

Сшйилган гўшт Фото муаллифлик ҳуқуқи HOJI BOBO

"Ўзстандарт" агентлиги Ўзбекистон ҳудудида "Ҳалол" стандарти расман қабул қилингани ҳақида хабар тарқатди.

Шу мақсадда Тошкентда "Ўзстандарт" раҳбарлари матбуот анжумани ташкил қилганлар.

Бундан кейин Ўзбекистонда ISO 22000 ва "Ҳалол" стандартлари расман жорий этилади.

ISO 22000 стандартлари - озиқ-овқат хавфсизлиги соҳасидаги менежмент тизими учун халқаро стандартлар туркумидир.

"Ҳалол" стандартларида маҳсулотларни ишлаб чиқариш, сақлаш, ташиш, сотиш ва маркалаш жараёнлари Ислом дини қоидаларига мувофиқ бўлиши талаб этилади.

Тошкентдаги матбуот анжуманида айтилишича, бугун бутун дунёда "Ҳалол" стандартлари талаблари асосида ишлаб чиқарилган маҳсулотлар бозорининг ҳажми 4,0 триллион АҚШ долларини ташкил этади.

Матбуот анжуманида "Ҳалол" туризм аҳамияти ҳақида ҳам гапирилган.

Ҳозир "Ҳалол" туризмнинг йиллик ҳажми 126 млрд. АҚШ долларини ташкил қилади, 2020 йилга келиб бу кўрсаткич 419 млрд. АҚШ долларга етади, деб кўрилмоқда.

Жаҳон сайёҳлик ташкилотининг маълумотларига кўра, ҳар йили 300-330 миллион сайёҳ дунёдаги энг муҳим диний объектларга ташриф буюришади.

"Ўзстандарт" агентлигига кўра, "Ҳалол" стандартининг жорий этилиши ўзбекистонлик ишлаб чиқарувчилар учун сотув бозорларини кенгайтириш ва сайёҳлик соҳасида зиёрат туризмини ривожлантиришга кўмак беради.

BBCUZBEK.COM билан Telegram орқали +44 7858860002 номери билан боғланинг. Telegram каналимиз: https://t.me/bbcuzbek

Бу мавзуда батафсилроқ