Трамп Эрдўғонни ғалабаси билан табриклади

Prezident Tramp Фото муаллифлик ҳуқуқи Reuters

АҚШ Президенти Дональд Трамп Туркия Президенти Ражаб Тойиб Эрдўғонни 16 апрелдаги референдумдаги ғалабаси билан табриклаган.

Америка ва Туркия президентлари телефон орқали суҳбатлашганлар.

Хабар қилинишича, Президент Трамп мулоқот чоғи Президент Эрдўғонга 7 апрелдаги Суриянинг "Шайрат" авиабазасини АҚШ ракеталари билан бомбардимон қилиш қарорини қўллаб-қувватлагани учун ҳам ўз миннатдорлигини изҳор этган.

Туркияни парламент республикасидан президентлик республикасига айлантиришга изн берадиган конституциявий ўзгартиришларни ёқлаб 51,4 фоиз сайловчи овоз бергани эълон қилинди.

Фото муаллифлик ҳуқуқи Reuters

Туркия референдумини Европада Хавфсизлик ва Ҳамкорлик ташкилоти "нотенг кампания" деб таърифлади.

Халқаро кузатувчиларга кўра, референдумдаги икки томонга ҳам баробар имконият берилмаган.

Қатор расмийларнинг "йўқ" кампанияси тарафдорларини террорчиларга хайрихоҳлар деб таърифлаганлари қабул қилиб бўлмасдир.

Туркияда ҳозир фавқулодда вазият амалда бўлгани боис ҳаётий муҳим эркинликлар чекланган, бу эса "йўқ" кампанияси тарафдорларига талаб қилинганидек ташвиқот-тарғибот ва намойишлар ўтказишга йўл бермаган.

Бу танқидларни рад этган Президент Эрдўғон халқаро кузатувчиларга "ўз жойингизни билинг" дея маслаҳат берди.

Мухолифат референдумдаги овоз бериш пайти қонун бузилишлари юз берганидан шикоят қилди.

Фото муаллифлик ҳуқуқи AFP
Image caption Мухолифат ўз норозилигини идиш-товоқни бир-бирига уриб билдирган

Мамлакат аҳолисининг чорак қисми яшайдиган Туркиянинг уч йирик шаҳри - пойтахт Анқара, Истанбул ва Измир яшовчилари конституцияга ўзгартиришлар киритилишига қарши овоз берганлари маълум бўлди.

Референдумдан бир кун ўтиб Туркиядаги фавқулодда вазият муддати яна узайтирилган.

Ўтган йили 16 июлида юз берган ҳарбий давлат тўнтаришига уриниш ортидан мамлакатда фавқулодда вазият эълон қилинган ва бир неча марта узайтирилган эди.

Фото муаллифлик ҳуқуқи Getty Images

Сўнгги тартиб муддати яна икки кундан кейин тугаши лозим эди.

Мамлакат раҳбарияти фавқулодда вазият муддатини яна уч ойга чўзишга қарор қилган.

Туркия хавфсизлик кенгаши қарорида айтилишича, фавқулодда вазият тартибининг узайтирилиши "ҳуқуқий давлат тамойилларини муҳофаза қилиш"га рухсат беради.

Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз:+44 78-58-86-00-02

ТЕЛЕГРАМДА ЭСА каналимиз - https://telegram.me/bbcuzbek

Instagram - BBC UZBEK

Twitter - BBC UZBEK

Odnoklassniki - BBC UZBEK

Facebook - BBC UZBEK

Google+BBC UZBEK

YouTube - BBCUZBEK (https://www.youtube.com/user/bbcuzbek)

Skype - uzbekbbclondon

bbcuzbek.comга тўсиқ бўлса, uzbekweb.netга киринг

Алоқадор мавзулар

Бу мавзуда батафсилроқ