Афғонистон: Толибон янги мавсум жанглари бошланиши ҳақида эълон қилди

Image caption Афғонистондаги сўнгги қатор ҳужумлар учун Толибон маъсулиятни ўз зиммасига олган

Афғонистондаги Толибон ҳаракати баёнот эълон қилган, бу баёнотида 1 май кунидан "Бадр" деб номланган баҳорги ҳарбий амалиётлар бошланиши айтилган.

Толибон баёнотида айтилишича, улар Афғонистон ҳукуматининг расмийлари, ҳукумат кучлари ва хорижий аскарларга қарши ўзларининг ҳужумларини кучайтирадилар.

Баёнотда тинч фуқароларга мурожаат қилиниб, одамлар гавжум жойларга, ҳукумат бинолари ва ҳарбий базаларга, ҳукумат кучларининг автомобиллар карвонларига яқинлашмасликка чақирилган.

Толибон "хорижий босқинчи кучлар, уларнинг жосуслари, Кобул маъмуриятдаги юқори лавозимдаги қўғирчоқ амалдорларга қарши ҳужумлар" режалаштиргани айтилган ҳаракат тарқатган баёнотда.

"Чет эллик босқинчилар Афғонистондан чиқиб кетмагунларича" жанг давом этади, дейилган Толибон хабарида.

Сўнгги ҳафталарда Толибон Афғонистондаги қатор ҳужумлар, жумладан Қандаҳор вилояти полицияси раҳбарининг ўлимига сабаб бўлган худкушлик ҳужуми, Жалолободдаги Афғон армияси тайёргарлик марказидаги портлаш учун масъулиятни ўзи зиммасига олган.

Бироқ жума куни АҚШ Мудофаа вазирлиги эълон қилган ҳисоботда Толибоннинг ҳарбий амалиётлари "умуман олганда тўхтатилгани", бунга қўшимча Америка аскарларининг Афғонистон ҳудудида жойлаштирилгани сабаб бўлгани айтилган.