Ҳагадаги маҳкама Сребреницадаги қирғиндан сўйлаган

Фото муаллифлик ҳуқуқи BBC World Service
Image caption Ратко Младич ўзига қўйилаётган айбловларни тан олмаган

Ҳагадаги Халқаро Трибуналда инсониятга қарши жиноятларда айбланаётган Босния серб армияси генерали Ратко Младич устидан маҳкама тўхтатилган.

Маҳкама ҳакамига кўра, қоралов томони химоя томонига барча исбот-далилларни тақдим этмаган, химоя томонининг далилларга жавоб тайёрлаши учун бир неча ой танаффус эълон қилинади.

Маҳкаманинг яна қачон давом этиши айтилмаган.

Маҳкаманинг иккинчи куни 1995 йилда Сребреницада амалга оширилган оммавий қотиллик айблови ҳақида бўлган.

У 1995 йилда Сребреница қишлоғида 8 мингга яқин мусулмон эркак ва болаларни ўлдирганликда, шунингдек, 10 минг одамнинг ўлимига олиб келган Сараево шаҳри қамалини мувофиқлаштирганликда ҳам айбланмоқда.

70 ёшли Младичга ҳарбий ва инсониятга қарши жиноятларга таалуқли 11та айблов қўйилган.

Младич ўзига нисбатан қўйилаётган айбловларни "қўрқинчли" деб атаган.

Ҳага трибунали Младич айбини тан олмаётгани айтган.

Маҳкама биноси олдида "Сребреница оналари" гуруҳи аъзолари йиғилишган.

Чоршанба кунги маҳкама давомида қораловчи генерал Младич Боснияни "этник тозалаш"га уринганини айтган.

Қораловчи Дермот Грум Младичнинг бу жиноятини аниқ далиллар билан исботлаб беришини билдирган.

"Тўрт кун олдин Ратко Младич ўша мудҳиш пайтдаги Сербия армиясининг бош қўмондони этиб сайланган кунга йигирма йил тўлди",- деб айтган қораловчи.

Жаноб Грум шундан сўнг Младич ва унинг армияси "қотиллик ҳунарини қанчалик мукаммал эгаллаганлари ва минглаб одамларни ўлдирганларини" таъкидлаган ва ўнлаб одамлар ҳалок бўлган Сараеводаги портлаш ҳақидаги видеолавҳани тақдим қилган.

Грумга кўра, бу портлаш Боснияни серб бўлмаганлардан "тозалаш режаси"нинг бир қисми бўлган.

70 ёшли собиқ генерал 16 йил давомида халқаро трибуналдан яшириниб юрганидан сўнг, ўтган йил майида серб махсус хизматлари томонидан қўлга олинган ва Ҳага трибуналига топширилган.

Ҳагадаги Би-би-си мухбирининг айтишича, Сребреница ҳамда Сараевода содир этилган жиноятлар Иккинчи Жаҳон урушидан кейин Оврўпода содир этилган энг жиддий ҳарбий жиноятлар ҳисобланади.

Маҳкама ишини тезлаштириш учун Младичга қўйилган айбловлар қариийб ярмига қисқартирилган.

Бу мавзуда батафсилроқ