ደቡብ ኮሪያ የማስጠንቀቂያ ተኩስ በሰሜኖች ላይ ከፈተች

የደቡብና ሰሜን ኮሪያ ደንበር Image copyright AFP/GETTY

የደቡብ ኮሪያ ወታደሮች የከዳ አባላቸውን እየፈለጉ በነበሩ የሰሜን ኮሪያ ድንበር ጠባቂዎች ላይ የማስጠንቀቂያ ተኩስ ሌሊት ላይ መተኮሳቸው ተዘገበ።

የሰሜን ኮሪያው ወታደር ከወታደራዊ እንቅስቃሴ ነፃ የሆነውን የድንበር አካባቢ ተሻግሮ ያለፈው ረቡዕ ሌሊት ላይ ነበር።

የኮበለለው ወታደር በጭጋግ ተሸፍኖ ከነበረው አካባቢ በድንገት የመቆጣጠሪያ ኬላ ላይ መከሰቱን የደቡብ ኮሪያ ሠራዊት ተናግሯል።

በዚህ ዓመት ብቻ ወደ ደቡብ ኮሪያ ከኮበለሉ ሰሜን ኮሪያዊያን መካከል ወታደሩ አራተኛ ነው። ይህ ክስተት ያጋጠመውም ከሳምንታት በፊት በቅርቡ ከተከሰቱት ኩብለላዎች አስደናቂ የተባለው ካጋጠመ በኋላ ነበር።

በዚያ ክስተትም የጋራ የደህንነት ክልል በሚባለው የፓንሙንጆም መንደር አካባቢ ከሰሜን ኮሪያ ሲኮበልል በጥይት ቆስሎ ያመለጠ ወታደር ወደ ደቡብ ኮሪያ ገብቶ ነበር።

ዛሬ ሐሙስ የደቡብ ኮሪያ መከላከያ ሚኒስቴር እንዳለው የሰሜን ኮሪያ ወታደሮች የኮበለለ አባላቸውን ፍለጋ ወደ ድንበሩ በተጠጉበት ጊዜ 20 የሚደርስ የማስጠንቀቂያ ተኩስ መተኮሳቸውን ገልጿል።

የከዳው ወታደር በሰሜን ኮሪያ ሠራዊት ቁጥጥር ስር ሲሆን የመክዳቱን ምክንያት ለማወቅ ምርመራ እየተደረገበት ይገኛል ተብሏል።

ከወታደራዊ እንቅስቃሴ ነፃ የሆነውን ክልል በማቋረጥ ወደ ደቡብ ኮሪያ ለመኮብለል በጣም ጥቂት ሰሜን ኮሪያዊያን ባቻ ናቸው የሚደፍሩት።

በዓለም ላይ በጥብቅ የሚጠበቀው ከወታደራዊ እንቅስቃሴ ነፃ የሆነው ይህ ክልል ሁለቱን ኮሪያዎች የሚለይ ሲሆን፤ በሁለቱም በኩል በአደገኛ የሽቦ አጥር፣ በመቆጣጠሪያ ካሜራዎች፣ በኤሌክትሪክ አጥርና በፈንጂ ታጥሮ የሚጠበቅ ነው።

ባለፈው ወር በአስደናቂ ክስተት የኮበለለው ወታደር ጂፕ መኪና እያሽከረከረ ወደ ድንበሩ በመጠጋት ነበር ያመለጠው። ይህም ክስተት በመቆጣጠሪያ ካሜራዎች ተቀድቶ ስለነበር ዓለም ተመልክቶታል።

ተያያዥ ርዕሶች